Ýteıa aralynda lańkestik saldarynan qaza tapqandardyń ishinde Grýzııa azamatshasy bar
ASTANA. 28 shilde. QazAqparat - Norvegııanyń Ýteıa aralyndaǵy lańkestik kezinde iz-túzsiz joǵalyp ketken Grýzııa azamatshasy Tamta Lıpartelıanıdiń norvegııalyq aralda óli denesi tabyldy.
Bul jóninde búgin Tbılısıde ótken brıfıng barysynda jýrnalısterge Grýzııa Syrtqy ister mınıstriniń orynbasary Nıno Kalandadze málimdedi, dep habarlaıdy RBK.
«Ókinishke qaraı, bizdiń eń qorqynyshty boljamdarymyz rastalyp otyr. Biz norvegııalyq quqyq qorǵaý organdarymen tyǵyz jumys istedik. Qaza bolǵandardy taný máselesine qatysty belgili qıyndyqtar týyndady. Keshe olar resmı túrde saýsaq izderi boıynsha málimetter surastyrdy, biz shuǵyl túrde olardyń suraǵan bıometrıkalyq málimetterin jiberdik», - dep habarlady mınıstrdiń orynbasary.
23 jastaǵy qyzdyń denesin taný sharasy tolyq aıaqtaldy. Norvegııalyq taraptyń habarlaýynsha, ol arqasyna atylǵan eki oqtan qaza bolǵan.
N.Kalandadzeniń aıtýynsha, Tbılısı norvegııalyq taraptyń T.Lıpartelıanıdiń máıitin otanyna qaıtarý úshin tasymaldaý sharalaryn tezirek uıymdastyratynyna senim artyp otyr. Ol, sonymen qatar, norvegııalyq taraptyń tasymaldaý, jerleý jáne týystaryna ótemaqy tóleý shyǵyndaryn óz mindetterine alǵanyn habarlady.
Grýzııa SІM qaza bolǵan qyzdyń otbasyna kóńil aıtty.
Ýteıa aralyndaǵy jastar lagerinde lańkestik oryn alǵan sátte eki grýzııalyq stýdent qyz bolǵan - N.Chhetıanı men T.Lıpartelıanı. N.Chhetıanı joǵalyp ketken qurbysyn tappaıynsha Grýzııaǵa qaıtpaıtyndyǵyn málimdegen. Qazir Norvegııaǵa T.Lıpartelıanıdiń ata-anasy attandy.
