Usynystardy qabyldaýǵa daıynbyz – «Qazavtojol» elordadaǵy Qabanbaı batyr dańǵylynyń keńeıtilýi jaıly
«Nur-Sultan qalasy ákimdiginiń bastamasymen bizge Qabanbaı batyr kóshesin tolyǵymen qaıta qurylymdaý týraly usynys túsken bolatyn. Olar tehnıkalyq-ekonomıkalyq negizdemeni ázirledi. Onyń boljamdy quny – 89 mlrd teńge. Bul aldyn ala eseptelgen boljamdy soma. Olar (ákimdik) tehnıkalyq-ekonomıkalyq negizdemeni quryp, saraptamadan ótkizip, bizge usyndy. Ol jerde taza qurylys jumystarynyń úlesi – shamamen 20 paıyzdy quraıdy. Qalǵan shyǵyndardyń bári de kommýnıkatsııa men káriz sý júıesin kóshirý, qalany kógaldandyrý sharýalarymen baılanysty», - dedi Jambyl Baqtııar «Qazavtojol» kompanııasynyń Instagram paraqshasynda suraqtarǵa jaýap bere otyryp.
Onyń aıtýynsha jobany ázirlegennen ákimdik úsh máseleni retke keltirýdi kózdeıdi.
«Ózderińiz biletindeı, Qabanbaı batyr kóshesiniń boıynda záýlim úıler boı kóterip, qala sol kósheniń boıynda ósip-órkendep keledi. Sol sebepti ol kósheniń boıyndaǵy kommýnıkatsııa jańǵyrtýdy talap etedi. Sol úshin ákimdik osy jobanyń esebinen kommýnıkatsııalyq máselelerdiń bárin retke keltirýdi kózdep otyr. Qazir bul másele tereń taldanýda. Jergilikti halyq tarapynan da osy kósheniń qurylysyna degen nazar erekshe. Sondyqtan jobanyń qaı bóligin ońtaılandyrýǵa bolatynyn qarastyryp jatyrmyz. Osy sátti paıdalanyp, jobalyq-smetalyq qujattama ázirlenetin kezde kimnen bolsa da jobalyq sheshimder boıynsha usynystardy qabyldap, qarastyrýǵa daıyn ekenimizdi aıtqym keledi. Jobalyq sheshimderdiń bári de ashyq kózderde jarııalanady. Ár adam jobalyq-smetalyq qujattamany kóre alady», - dedi ol.
Eske sala ketsek jyl basynda ótken Úkimettiń keńeıtilgen otyrysynda elorda ákimi Altaı Kólginov Qabanbaı batyr dańǵylyn 8 jolaqqa deıin keńeıtiletinin málim etken edi.
