Usynylatyn memlekettik qyzmetter sapasy jaqsaryp keledi - Aıgúl Shaıymova

ASTANA. QazAqparat - Búgin Ortalyq kommýnıkatsııalar qyzmetindegi baspasóz máslıhatynda QR Memlekettik qyzmet isteri vıtse-mınıstri Aıgúl Shaıymova jańa Ádep kodeksiniń memlekettik qyzmetkerler aldyna qandaı talaptar qoıatyndyǵy jaıynda aıtyp berdi.

Onyń sózine qaraǵanda, memlekettik qyzmetkerler tártibiniń standarttary ekige jiktelgen: bazalyq jáne ahýaldyq. Bazalyq standarttar memlekettik qyzmetkerlerdiń moraldyq-etıkalyq turpatyna negizgi talaptardy bekitýge jáne olardyń júris-turysynyń vektoryn aıqyndaýǵa baǵyttalǵan.

«Jalpy standarttarǵa  qabyldanǵan sheshimderdiń zańdylyǵyn, ádildik pen ashyqtyqtyǵyn qamtamasyz etý, qyzmettik mindetterdi tıimdi oryndaý úshin kásibı deńgeıdi arttyrý, jeke máselelerdi sheshý turǵysynda qyzmettik laýazymyn paıdalanýǵa tyıym salý, iskerlik ádep pen resmı júris-turys erejelerin saqtaý qamtylǵan. Óz kezeginde Kodeks memlekettik qyzmetkerlerge únemi kórsetiletin memleketik qyzmetterdiń sapasyn arttyrý talabyn qoıady», - dedi vıtse-mınıstr.

Saýalnama nátıjesine qaraǵanda, memlekettik qyzmetter sapasyna halyqtyń kóńili tolýynyń deńgeıi 80 paıyzdy qurap otyr. Jalpy Kodeks qyzmetkerlerdiń júris-turysy mádenıeti, sondaı-aq qyzmettik mindetterdi oryndaý mádenıeti talaptaryn bekitti.

Vıtse-mınıstrdiń sózinshe, jyl saıyn usynylatyn memlekettik qyzmetter sapasy jaqsaryp keledi. Buǵan júrgizilgen áleýmettik saýalnama nátıjesi dálel bolýda.