Ústirt qoryǵyndaǵy janýarlardyń tabıǵat aıasyndaǵy tirshiligi fototuzaqqa túsirildi
AQTAÝ. KAZINFORM – Mańǵystaýda Ústirt memlekettik tabıǵı qoryǵynda ornatylǵan fototuzaqtar jabaıy janýarlardyń tabıǵı ortadaǵy tirshiligin baqylaýǵa múmkindik berip otyr.
Ústirt qoryǵynyń aýmaǵynda sútqorektiler men qustardyń ondaǵan túri mekendeıdi. Olardyń arasynda Ústirt mýflony, qaraquıryq, aqbóken, qaraqal, manýl, qum mysyǵy, shubar kúzen, bal borsyq, qarsaq jáne túlki bar. Sonymen qatar qoryq aýmaǵynda qasqyr men shıbóri de kezdesedi.
Sırek kezdesetin qustardyń qatarynda búrkit, dala qyrany, ıtelgi, lashyn, tazqara, jylanjegish, úki, qoqıqaz jáne jorǵa dýadaq bar.
Janýarlardy baqylaý úshin qoryq aýmaǵyna arnaıy fototuzaqtar ornatylǵan. Avtomatty kameralar mamandardyń kómeginsiz-aq, janýarlardyń fotosy men beınejazbasyn túsirýge múmkindik beredi.
Mamandar alynǵan materıaldar arqyly janýarlardyń qozǵalysyn, minez-qulqyn, taralý erekshelikteri men tirshilik etý jaǵdaıyn zertteıdi. Fototuzaqtar janýarlar dúnıesiniń jaǵdaıyn turaqty baqylaýǵa da múmkindik beredi.
Qoryq mamandarynyń aıtýynsha, avtomatty kameraǵa túsken árbir kadr tabıǵattaǵy belgili bir sátti kórsetip qana qoımaı, ǵylymı zertteýler úshin de mańyzdy. Jınalǵan materıaldar bıoalýantúrlilikti baqylaý jáne ony saqtaý jumystaryna paıdalanylady.
Buǵan deıin, Byltyr 11 aralda bar edi, bıyl ekeýinde ǵana: Kaspııdiń tartylýy ıtbalyqqa qalaı áser etip jatyr.
