Ústirttiń Qazaqstandaǵy bóliginde qabylan paıda boldy

ASTANA. QazAqparat - Ústirttiń Qazaqstandaǵy bóliginde fototuzaqqa qabylan túsip qaldy. Bul týraly QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet jarııa etti, dep habarlaıdy QazAqparat.

«Ǵajap! Ústirt memlekettik tabıǵı qoryǵynyń qyzmetkerleri keremet jańalyqty habarlady. Qoryq aýmaǵynda qabylan paıda boldy», - dep jazdy Sáken Dildahmet Feısbýktegi paraqshasynda.

 

Onyń jazýynsha, kezinde bul óńirde gepardtar tirshilik etken. Al qabylannyń kezigýi birinshi ret tirkelip otyr. Sáken Dildahmettiń jazýynsha, sýret fototuzaq arqyly túsirilgen.

Eske sala ketsek, Ústirttiń qazaqstandyq bóliginde sırek kezdesetin janýarlardyń bary dáleldengenin buryn da habarlaǵan bolatynbyz. Qazaqstannyń bıoalýantúrlilikti saqtaý qaýymdastyǵynyń (QBSQ) ekinshi ekspedıtsııasy Ortalyq Azııa shólderi jónindegi bastama (OAShB) jobasy boıynsha Ústirttiń Qazaqstandaǵy ońtústik bóligine baryp, osyndaı tujyrym jasaǵan.