Ústirtte kózge túsken qabylanǵa «Taý sheri» esimi berildi

ASTANA. QazAqparat - Ótken jyly Ústirtte fototuzaqqa ilingen qabylanǵa «Taý sheri» degen esim berildi. Bul týraly QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet Feısbýk paraqshasynda jazdy, dep habarlaıdy QazAqparat.

«Dostar! Bizdiń qabylanǵa «Taý sheri» degen esim berildi. Ótken jyly Ústirt memlekettik tabıǵı qoryǵynyń qyzmetkerleri fototuzaqqa birinshi ret qabylandy túsirip alǵan bolatyn. Sol tusta qoryq qyzmetkerleri qabylandy zertteýdi bastaǵan. Ekspedıtsııa qorytyndysy boıynsha mamandar mysyq tuqymdastardyń sırek kezdesetin túri - aldyńǵyazııalyq qabylannyń júrgenin rastady», - dep jazady Sáken Dildahmet.

Osyǵan baılanysty QR Aýyl sharýashylyǵy mınıstrligi Orman sharýashylyǵy jáne janýarlar dúnıesi komıteti 12-16 jas aralyǵyndaǵy jáne 16 jastan asqan oqýshylar arasynda «Qabylanǵa esim ber» atty baıqaý jarııalaǵan. Aqyry, baıqaý barysynda 70 sýret pen 80 usynys kelip túsken.

«Seksenge tarta usynystyń ishinde tóreshiler bir aýyzdan «Taý Sheri» degen atty tańdap aldy. Jeńimpaz - Shaıyr aýylynyń turǵyny Álııa Omarqyzy. Baıqaýdy ótkizýde bas demeýshi Qazaqstan bıoártúrliligin saqtaý qaýymdastyǵy boldy», - deıdi Sáken Dildahmet.

Eske sala keteıik, Ústirtte alǵash ret qabylan kózge túskenin buǵan deıin jazǵan bolatynbyz.