«Ústirt qupııasy» ekspedıtsııasynyń ókilderi Mańǵystaýdyń 1350 km aýmaǵyn basyp ótti
AQTAÝ. QazAqparat - «Ústir qupııasy» ekspedıtsııasynyń músheleri 8 kúnde 1350 km jerdi basyp ótip, Aqtaý qalasyna kelip, Mańǵystaý oblysynyń ákimdiginde boldy. Munda olardy oblys ákimi Eraly Toǵjanov qabyldady, dep habarlaıdy «QazAqparat» HAA tilshisi.
Marǵulan Seısembaev bastaǵan «Nomad Explorer» komandasy qazaqstandaǵy eskertkishterdi nasıhattaý men ishki týrızmdi damytý maqsatynda ekinshi ret júzdegen km qashyqtyqty júrip ótti. Komanda músheleri kún saıyn ortasha alǵanda 160 km qashyqtyqty júrip otyrdy. Osylaısha, olar Tamshaly, Sultan-epe, Shaqpaq atý, Sherqalý, Túzbaır, Bozjyra men ózge de nysandarǵa baryp qaıtty.
«Biz Mańǵystaýdyń kórkin tamashaladyq. Ókinishke oraı, Qazaqstanda osyndaı keremet kórikti jerler bar, alaıda biz olardyń ylǵı da baǵasyna jetip, nasıhattaı bermeımiz. Sýretter arqyly bárin jetkizý múmkin emes. Bizdiń mindetimiz osy ásemdikti seziný edi. Biz tipti adam qolymen jasaý múmkin emes jerlerde bolyp, jerasty meshitteri men tabıǵı eskertkishterdi kórdik. Olardyń kópshiligin osy jerdiń jergilikti turǵyndary jasap, qaldyrǵan. Men ákimge aldaǵy 6 aıdyń kóleminde Maǵystaý oblysynyń elshisi sııaqty osy aımaq týraly áńgimelep, ony nasıhattap, aımaqtyń kórikti jerleri men eskertkishteri jóninde aıtyp júremiz dep ýáde etken edim. Ekspedıtsııanyń árbir múshesi kórgenderin aıtpaı tura almaıdy. Sizder ábden qýattanyp aldyńyzdar, endi ózderińizdiń alǵan áserlerińizben bólisińizder»,-dedi Marǵulan Seısembaev.
Ókinishke oraı kezdesýge ekspedıtsııanyń tek keıbir músheleri ǵana kelgen. Komandanyń 60 paıyzy tarap ketken. Kezdesýge kelgenderdiń arasynda qazaqstandyqtarmen qatar Polsha, Reseı, Qyrǵyzstan eliniń ókilderi de bar.
«Men barlyǵyńyzǵa alǵysymdy bildiremin, Menińshe, biz keremet umtylmas kúnderdi bastan ótkerdik. Biz ózimizdiń óńirimizdi jaqsy bile bermeımiz, ádette adamdar ózge elder týraly kóbirek biledi. Munda tek tarıhty jaqsy biletin jáne oǵan nemquraıly qaraı almaıtyndar, osy aımaqtyń kórkin óz kózimen kórgisi keletinder ǵana jınaldy. Sizder osy jınaǵan aqparattaryńyzdy búkil elge taratasyzdar degen oıdamyn. Men sonymen qatar osyndaı erekshe is-sharalardy uıymdastyryp júretin Marǵulanǵa alǵysymdy bildirgim keledi. Men endi osy aımaqtyń eń tanymal 25 orny týraly kitapty syıǵa tartqym kelip tur»,-dedi Eraly Toǵjanov.
