Ústimizdegi jylǵy jańa oqý jylynda Astana qalasynyń bastaýysh synyp oqýshylary túgeldeı ystyq tamaqpen qamtylatyn bolady
ASTANA. Aqpannyń 12-si. QazAqparat /Gúlmıra Álıakparova/ - Bıylǵy jańa oqý jylynda Astana qalasyndaǵy 1 men 4-shi synyp aralyǵyndaǵy mektep oqýshylary, olardyń áleýmettik jaǵdaılaryna qaramastan túgeldeı ystyq tamaqpen qamtamasyz etiletin bolady.
Bul týraly búgin elordalyq «Báıterek» medıa-ortalyǵynda ótken baspasóz máslıhatynda qalalyq Bilim berý basqarmasy Balalardy memlekettik qoldaý bóliminiń bastyǵy Qarlyǵash Sarkenova málim etti, dep habarlaıdy QazAqparat.
Esterińizge sala keteıik, ústimizdegi jyldan bastap 1 men 4 synypqa deıingi elordalyq mektep oqýshylary túgeldeı ystyq tamaqpen qamtylatynyn aǵymdaǵy aqpan aıynyń 4-i kúni óziniń halyqpen kezdesýinde qala ákimi Imanǵalı Tasmaǵambetov aıtqan bolatyn.
Q.Sarkenovanyń aıtýynsha, bul máselege daıyndyq búginnen bastap júrgizilýde. Máselen, orta bilim berý mekemelerindegi tamaqtaný oryndarynyń balalardy qabyldaýǵa ázirlik deńgeıleri tekserilip, olardyń birqataryna tipti kúrdeli jóndeý júrgizý de kózdelgen. «Bastaýysh synyptarda oqıtyn 30 myńǵa jýyq oqýshyny tegin ystyq tamaqpen qamtý úshin 440 mıllıon teńge qarajat qajet. Bul baǵyttarda búgin is-sharalar jospary bekitildi», - dep atap ótti ol.
Aıta keteıik, qazirgi kúni Astanada jumys istep turǵan 78 jalpy orta bilim berý mekemesiniń 64-inde ystyq tamaq uıymdastyrylǵan. Ystyq tamaqpen 67 myńnan astam oqýshynyń 40 myń 614-i nemese 60 paıyzy qamtylǵan. Áleýmettik jaǵynan álsiz toptarǵa jatatyn 4 myńnan astam bala tamaqty tegin alady. Al 1 men 4-shi synyptar aralyǵynda bilim alatyn 26 myń 471 balanyń áleýmettik jaǵdaılaryna baılanysty tegin tamaqpen qamtylǵany - 1794. Bir balany ystyq aspen aýqattandyrýǵa bıýdjetten bólinetin soma 2010 jyldyń qańtarynda 197 teńgeni qurady ( 2009 jylǵy 184 teńge).
