KÓKShETAÝ. QazAqparat - Ústemeaqy medıtsına qyzmetkerlerin jigerlendiredi. Bul týraly Aqmola oblystyq kópbeıindi aýrýhanasy janyndaǵy provızorlyq stantsıonardyń aǵa medbıkesi Lázzat Bilálova aıtty, dep habarlaıdy QazAqparat tilshisi.
Onyń aıtýynsha, osyndaı jaýapty sátte aty jaman indetpen kúresip jatqan dárigerlerdiń eńbeginiń elengeni medıtsına salasynyń barsha qyzmetkerleriniń kóńilinen shyǵyp otyr.
«Memleket basshysy óziniń úndeýinde jahandy jaılaǵan koronavırýs ınfektsııasymen kúresýde dárigerler men medıtsına qyzmetkerlerine úlken senim artyp otyrǵandyǵyn aıtqan edi. Osy rette, Prezıdenttiń tapsyrmasymen koronvırýs ınfektsııasyna qarsy kúrestiń aldyńǵy leginde júrgen medıtsına salasynyń qyzmetkerlerine ústemeaqynyń tólenýi olardyń jaýapkershiligin arttyp, odan saıyn jigerlendire túsedi», - deıdi Lázzat Bilálova.
Joǵary sanatty, 25 jyldyq tájirıbesi bar Lázzat Bilálova qazirgi kezde, Aqmola oblystyq kópbeıindi aýrýhanasy janyndaǵy provızorlyq stantsıonarda aǵa medbıke bolyp qyzmet isteýde. Atalmysh provızorlyq stantsıonarda barlyǵy 36 adam karantınde jatyr. Olarǵa dáriger, medbıke, sanıtary bar 30-dan astam medıtsınalyq qyzmetker qyzmet kórsetýde. Onyń úıine barmaı, osyndaı jumys istep jatqanyna úsh aptadaı bolypty.
«Árıne, otbasymdy saǵyndym. Bir qalada tursaq ta jaqyndarymmen telefon arqyly beınebaılanys arqyly sóılesemiz. Eń bastysy saǵynysh emes, dertti jeńip, adamdardyń tezirek saýyǵyp ketýi. Bizderge memleket, basshylyq tarapynan barlyq jaǵdaı jasalyp otyr. Oblystyq aýrýhananyń janyndaǵy jataqhanada turyp jatyrmyz. Medıtsınalyq qural-jabdyqtarmen qamtamasyz etti. Osydan birer kún buryn 400 myń teńge shamasynda ústemeaqy aldyq. Sondyqtan esh alańsyz qyzmetimizdi atqarýdamyz», - dep tolyqtyrdy Lázzat Bilálova.
Aıta keteıik, osyǵan deıin habarlaǵanymyzdaı, Aqmola oblysynda 500-den astam dáriger ústemeaqy alǵan bolatyn.
