Ústemeaqy medıtsına qyzmetkerlerin jigerlendire tústi – Elena Kolpakova
ORAL. QazAqparat – Ústemeaqy medıtsına qyzmetkerlerin odan saıyn jigerlendire tústi. Batys Qazaqstan oblysynyń Báıterek aýdanynda provızorlyq statsıonarda eńbek etip jatqan juqpaly aýrýlar dárigeri Elena Kolpakova osyndaı pikirimen bólisti, dep habarlaıdy QazAqparat tilshisi.
E.Kolpakova óz mamandyǵy boıynsha 27 jyl qyzmet etip keledi.
Báıterek aýdanyndaǵy provızorlyq statsıonar bıylǵy 20 aqpannan beri jumys jasaýda. Onda Báıterek aýdandyq aýrýhanasynyń qyzmetkerleri uıymshyldyqpen qyzmet atqarýda.
Onyń sózine qaraǵanda, statsıonarǵa túskenderden synama alynady. Synama barlyq saqtyq sharalary qoldanyla otyryp, vırýsologııalyq zerthanaǵa jiberiledi. Koronavırýs anyqtalǵan jaǵdaıda naýqas birden oblystyq juqpaly aýrýlar aýrýhanasyna aýystyrylady. Al JRVI jáne pnevmonııamen aýyrǵandar osynda emdeledi.
«Karantındik jumysqa ázirlik turaqty júrgizildi. Sondyqtan asa bir qıyndyq týyndaǵan joq. Negizgi quram ústemeaqy bolatynyn bilmeı-aq jumys istedi. Barlyq qaýipsizdik talaptaryn saqtaı otyryp, karantınde jatqan emdelýshilerge qyzmet kórsetti. Bul – kez kelgen juqpaly aýrýlar statsıonaryndaǵy qalypty jumys. Árıne, ústemeaqynyń tólenýin qyzmetkerler eńbektiń baǵalanýy retinde qabyldady. Bul bizge jaýapkershilik júgin ústeı túsedi», - dedi QazAqparat tilshisine Elena Kolpakova.
Eske sala keteıik, BQO-da 215 medıtsına qyzmetkerine 22,6 mln teńge somasyna ústemeaqy berildi.
Jalpy óńirde koronavırýsqa shaldyǵýdyń 11 oqıǵasy tirkeldi. Sońǵy anyqtalǵan eki naýqastyń biri Reseıden kelgen.
