Ústel tennısinen Olımpıadaǵa qatysqan Gerasımenkoǵa eki bólmeli páter berildi

ASTANA. KAZINFORM – Qazaqstannyń ústel tennısi federatsııasy Parıj Olımpıadasynda sheberlik tanytyp, myqtylarmen ıyq tirestire bilgen Kırıll Gerasımenkony júlde almasa da marapatsyz qaldyrmady.

Esterińizge salsaq, Kırıll Gerasımenko erler arasyndaǵy jekeleı synda 9-oryndy ıelendi. Buǵan deıin qazaqstandyq ústel tennıs sheberleri mundaı nátıjege qol jetkizgen emes.

Gerasımenko Parıj Olımpıadasyndaǵy alǵashqy kezdesýinde Panamerıka oıyndarynyń jartylaı fınalısi chılılik Býrgosty jeńdi. Al ekinshi kezdesýinde sensatsııa jasap, aıdy aspanǵa shyǵardy. Atap aıtsaq, Eýropa chempıony nemis Dan Tsıýdan 3-1 esebimen jeńilip jatyp, 4-3 esebimen jeńisti julyp aldy.

Al shırek fınalǵa joldama alý jolynda tórt Olımpıadanyń qatysýshysy, tájirıbeli Omar Assarmen (Egıpet) sheberlik baıqasyp, 4-2 esebimen ese jibergen edi.

Aıta keteıik, Parıj Olımpıadasynan keıin Gerasımenko álemdik reıtıngtegi pozıtsııasyn 46-dan 37-ge deıin jaqsartty.

«Bul – bizdiń sport úshin tarıhı oqıǵa. Týrnır barysynda Kırıll erik-jigerdiń myzǵymas kúshin, sheberligin, kásibıligin jáne naǵyz sporttyq talantyn kórsetti. Ol ústel tennısiniń qazaqstandyq sheberleri álemdegi eń myqty sportshylarmen laıyqty básekelese alatynyn kórsetti», - dedi Qazaqstan ústel tennısi federatsııasynyń prezıdenti Danııar Ábilǵazın.

Esterińizge salsaq, buǵan deıin Kırıll Gerasımenko aldaǵy Olımpıada oıyndaryna qatysty josparymen bólisken bolatyn.