Ústel tennısinen Azııa chempıonaty: 14 jasar ırandyq sportshy Olımpıada chempıonyn jeńdi

ASTANA. KAZINFORM – Astanadaǵy ústel tennısinen Azııa chempıonatynda erler arasyndaǵy komandalyq saıys boıynsha shırek fınaldyq báseke ótip jatyr. 

Qytaı quramasy Iranmen sheberlik baıqasyp, 3:1 esebimen jeńiske jetti.

Alǵashqy oıynda Parıj Olımpıadasynyń chempıony, álemdik reıtıngide birinshi orynda turǵan Van Chýtsın  14 jastaǵy ırandyq sportshy, álemniń 210-shy tennısshisi Bendjamın Faradjımen kezdesti.

Tartysty ótken saıysta ırandyq sportshy 1:2 esebimen jeńilip jatqan. Alaıda tórtinshi partııada qarsylasyn qapy qaldyrdy. Sheshýshy kezeńde Bendjamın Faradjı 4:0 esebimen alǵa shyqty. Olımpıada chempıony esepti teńestirgenimen (9:9), ırandyq oıynshy qarsylastyń qatelikterin ońtaıly paıdalanyp, 11:9 esebimen jeńiske jetti. Qortyndy esep – 3:2. 

Alaıda, álemdik reıtıngide úshinshi oryndaǵy qytalyq tennısshi Lın Shıdýn ırandyq Almııan Noshadty 3:2 esebimen jeńse, Lıan Tszınkýn (álemdik reıtıngide besinshi oryn) Mýsavı Taher Muhammedti 3:0 esebimen qapy qaldyrdy. 

Jartylaı fınalda Qytaı quramasy Ońtústik Koreıamen kezdesedi.

Eske sala ketsek, ústel tennısinen Azııa chempıonaty 7 qazan kúni Astanadaǵy BEELINE ARENA Ulttyq tennıs ortalyǵynda jalaýyn kóterdi. Týrnırde 26 elden kelgen 210 sportshy synǵa túsedi.