Ústel tennısinen ÁCh: Sportshylarymyz alǵash ret pleı-off kezeńinde synǵa tústi

ASTANA. KAZINFORM – Ońtústik Koreıanyń Pýsan qalasynda ótip jatqan ústel tennısinen komandalyq álem chempıonatynda Qazaqstannyń erler quramasy alǵash ret pleı-off satysynda óner kórsetti.

Ókinishke qaraı, otandastarymyz pleı-off kezeńinde Úndistan quramasymen synǵa túsip, 3:2 esebimen utylyp qaldy.

Jerlesterimiz pleı-off kezeńine deıin V tobynda Saýd Arabııasy (3:0) men AQSh-tan (3:1) basym tústi. Eger Ulttyq qurama shırek fınalǵa shyqsa, Parıj Olımpıadasynyń lıtsenzııasyna ıe bolar edi.

Atalǵan oıynǵa qysqasha toqtalyp ótsek, Qazaqstannyń erler quramasy tuńǵysh ret pleı-offqa joldama aldy.

Qazaqstan alǵash ret toptyq kezeńde 2 jeńiske qol jetkizdi.

Elimizdiń birinshi nómirli sportshysy Kırıll Gerasımenko barlyq 9 oıynda jeńiske jetti.

Álemdik reıtıngte 40-orynda turǵan Kırıll Gerasımenko jarys barysynda Olımpıadanyń 2 márte qola júldegeri Dmıtrıı Ovcharov (álemdik reıtıngte 13-oryn), komandalyq álem chempıonatynyń kúmis júldegeri Dang Kıý (álemdik reıtıngte 10-oryn), Lıam Pıtchfordtan (álemdik reıtıngte 25-oryn) basym tústi.

Qazaqstan quramasynyń osyǵan deıingi jetistikteri:
2022 jyl - toptyq kezeńde 4-orynmen aıaqtady. Álem chempıonatynda Ózbekstan quramasynan 3:0 esebimen basym túsip, birinshi ret jeńiske qol jetkizdi.
2018 jyl - 2 dıvızıon
2016 jyl - 3 dıvızıon
2014 jyl - 3 dıvızıon
2012 jyl - 4 dıvızıon