Ústel tennısinen VI jazǵy Spartakıada máresine jetti
QARAǴANDY. QazAqparat – Qaraǵandy qalasyndaǵy Saryarka ortalyǵynda ótken ústel tennısinen VI jazǵy Qazaqstan Spartakıadasynyń jeńimpazdary anyqtaldy, dep habarlaıdy QazAqparat Sportty damytý dırektsııasynyń baspasóz qyzmetine silteme jasap.
Erler arasynda jekeleı synda elordalyq Kırıll Gerasımenko qaraǵandylyq Alan Qurmanǵalıevten basym tústi. Fınal 4:1 esebimen tájirıbeli oıynshynyń paıdasyna aıaqtaldy.
Aralas juptyq synda Záýresh Akasheva men Vladıslav Zaharov dýeti Kırıll Gerasımenko men Anastasııa Lovrovaǵa tótep bere almady. Esep – 0:3.
Bekulan Jamal/Sarvınoz Mırkadırova (Shymkent);
Alan Qurmanǵalıev/Araı Ashkeeva (Qaraǵandy oblysy).
Áıelder arasynda shymkenttik Sarvınoz Mırkadırova men Anel Baqyt juby batys Qazaqstan oblysynan kelgen Gúlchehra Hýseınova men Alsý Saparovany utty.
3-oryn – ıÝlııa Danııarova/Alına Dýbrovskaıa (Qostanaı oblysy);
Aııa Álimbaeva/Valentına Ýspanova (Almaty).
Alan Qurmanǵalıev pen Vladıslav Zaharov ekeýi fınalda aǵaıyndy Kırıll jáne Aleksandr Gerasımenkodan basym tústi. Qola medal: Denıs Jolýdev/Sagantaı Qurmambaev (ShQO) pen Baqdáýlet Ákimáli/Bekulan Jamal (Shymkent).
Komandalyq saıysta Qaraǵandy oblysy fınalda Shyǵys Qazaqstan oblysyn 3:1 esebimen jeńdi. Alan Qurmanǵalıev, Vladıslav Zaharov, Temirlan Kım, Ámir Torǵaıbekov, Raıymbek Kelbuǵanov chempıon atandy. Kúmis medal Denıs Jolýdev, Saǵantaı Qurmambaev, Sergeı Konovalov, Kırıll Sotnık, Arnur Oralhanovtyń enshisinde.
Áıelder arasynda da Qaraǵandy oblysynyń quramasy qarsylas shaq keltirgen joq. Záýresh Akasheva, Araı Ashkeeva, Janerke Kóshkimbaeva, Aleksandra Smırnova, Vıktorııa Mochalkına bestigi fınalda Shymkent komandasyn senimdi utty. Esep – 3:1.
Kúmis júldegerler – Anel Baqyt, Sarvınoz Mırkadırova, Gúlnoz Kamıljanova, Malıka Rasýlmetova, Aqnıet Amangeldi.
Jalpy esepte Qaraǵandy oblysy chempıon atansa, Astana qalasy 2-shi, Shymkent qalasy 3-orynǵa turaqtady.
Spartakıada qorytyndysy boıynsha Ulttyq qurama jasaqtalady. Elimizdegi barlyq oıynshy osynda keldi. Báriniń nátıjesin baqylap otyrýǵa tyrystym. Qazir ústel tennısiniń barlyq óńirde damyp kele jatqany qýantady. Buryn tartys Almaty, Astana men Pavlodar arasynda ótetin. Bul joly 7-8 komanda bir deńgeıde júldege talasty. Ulttyq qurama jasaqtaıtyn kezde qınalaıyn dep turmyz. Birinshi jáne ekinshi nomirli sportshylar fınalda óner kórsetti. Sheberligi shyńdalǵan almatylyq Aıdos Kenjeǵulov pen Anastasııa Lovrova syndy oıynshylardy atap óte alam. Olardyń arasynan Ulttyq quramanyń 3-nomirli tennısshisin tańdaımyz
, - dedi Ulttyq quramanyń bas bapkeri Elmıra Alıeva.
Sportshylardy marapattaý rásimine QR MSM Sportty damytý dırektsııasy dırektorynyń orynbasary Azamat Imashev, Qazaqstan ústel tennısi federatsııasynyń atqarýshy hatshysy Danıl Pak, Qaraǵandy oblysy dene shynyqtyrý jáne sport basqarmasynyń basshysy Temirhan Abylaev qatysty.
Aıta keteıik, 20 naýryzda bastalǵan ústel tennısi básekesine 20 óńirden 180-nen astam sportshy qatysty.
