Ústel tennısinen Qazaqstan quramasynyń bas bapkeri taǵaıyndaldy
ASTANA. QazAqparat - Búgin Almaty qalasynda Qazaqstan Respýblıkasy Ústel tennısi federatsııasy bapkerler keńesi men sportshylardyń qatysýymen jınalys ótkizdi. Jıynda 2018 jylǵa arnalǵan bapkerler quramy, ulttyq qurama sportshylarynyń daıyndyǵyn jaqsartý jáne bapkerler jumysyn jetildirý máseleleri qaraldy, dep habarlaıdy olympic.kz
Bapkerler quramy men federatsııa basshylyǵynyń usynysy boıynsha Ulttyq quramaǵa bas bapker retinde Elmıra Kaıyrqyzy Álıevanyń kandıdatýrasy usynylyp maquldandy.
Ulttyq quramanyń aǵa bapkeri bolyp Pereverzev Dmıtrıı Vladımırovıch, al jastar quramasynyń aǵa bapkeri bolyp Samat Asqaruly Beısenov taǵaıyndaldy.
Jasóspirimder jáne kadetter quramasynyń aǵa bapkerligine Tımchenko Evgenıı Anatolevıch taǵaıyndaldy.
«Maǵan osyndaı senim artyp otyrǵany úshin federatsııamyzdyń Prezıdenti Qasym-Jomart Kemelulyna jáne áriptesterime úlken alǵys aıtqym keledi. Sońǵy ýaqyttarda federatsııa basshylyǵyna Qasym-Jomart Toqaev kelgeli keremet ózgerister bolyp jatqanyn bilesizder. Birneshe óńirde ústel tennısine arnalǵan zaldar ashyldy, eski zaldar jóndeýden ótti. Óte sapaly ústelder men raketkalar óńirlerge federatsııa tarapynan satyp alynyp jóneltildi. Osy jumystardy eskere kele, biz alǵa qoıylǵan tapsyrmalardy ýaqytyly oryndap jankúıerler senimin aqtaýǵa barymyzdy salamyz degim keledi», - Elmıra Álıeva.
