Ústel tennısi: Kırıll Gerasımenko álemdik birinshilikti jeńispen bastady
ASTANA. QazAqparat - Qazaqstandyq Kırıll Gerasımenko ústel tennısinen Bolgarııanyń ashyq birinshiliginde synǵa túsip jatyr. Bizdiń sportshymyz alǵashqy aınalymdy sátti bastady, dep jazady Olympic.kz.
Panagıýrıshte qalasynda ótip jatqan chempıonattyń irikteý aınalymyna 168 tennısshi qatysqan bolatyn. Gerasımenko kelesi kezeńge ótken 16 sportshynyń qataryna endi.
Birinshi kezeńde jerlesimiz tájirıbeli reseılik sportshy, juptasyp óner kórsetýde jasóspirimder arasyndaǵy álem chempıonatynyń kúmis, Eýropa chempıonatynyń qola júldegeri Kırıll Skachkovpen kezdesti.
Eki sportshy arasyndaǵy báseke tartysty ótip, 4:3 esebimen jeńiske jetken jerlesimiz kelesi aınalymǵa joldama aldy.
«Qarsylasymyz irikteý kezeńderine synǵa túsip, zalǵa boı úıretip aldy. Al Kırıll Gerasımenko úshin bul chempıonattaǵy alǵashqy oıyn. Birinshi oıyn qashanda qıynǵa soǵady, onyń ústine zalǵa úırenisý ońaı emes. Ol oıyndy senimdi túrde bastap, 2:0 esebimen alǵa shyqty. Alaıda, Skachkov óz qalpyna kelip, qatelikke boı aldyra qoıǵan joq. Degenmen bizdiń sportshymyz jetinshi partııada belsendiligin arttyra túsip, jeńiske jetti. Kırıldiń eki jarym aıǵa sozylǵan úzilisten soń resmı jarysqa qatysyp, jaqsy oıyn kórsetkeni qýantady», - deıdi Qazaqstan quramasynyń keńesshi bapkeri Dmıtrıı Levenko (Avstrııa).
