Ústel tennısi: Alan Qurmanǵalıev álem chempıonatynda altynǵa qosa qola medal jeńip aldy
ASTANA. QazAqparat – Týnıste ústel tennısinen jasóspirimder arasynda máresine jetken álem chempıonatynda Alan Qurmanǵalıev altynǵa qosa qola medal jeńip aldy, dep habarlaıdy QazAqparat tilshisi.
Qazaqstan ústel tennısi federatsııasynan málim etkenindeı, Elmıra Álıeva jattyqtyratyn 15 jasar qaraǵandylyq sportshy mysyrlyq Hana Godamen aralas jupta álem chempıony atansa, jekeleı synda úzdik úshtikke ilikti.
Jekeleı synda 15 jastaǵy jasóspirimder arasynda frantsııalyq Flavıen Koton top jarsa, japonııalyq Eshııama Kazýkı ekinshi orynǵa ıe boldy. Alan Qurmanǵalıev taǵy bir japonııalyq Tanımoto Takýmımen birge úshinshi satyǵa kóterildi.
«Týnıske barar aldynda biz Alanmen birge eki medal alýdy maqsat etken edik, sony oryndadyq. Jattyǵý zalynda kóp eńbektendik, «WTT Contender» týrnırlerine qatysyp, tájirıbe jınaqtadyq. Halyqaralyq reıtıngidegi ornymyzdy jaqsarttyq. Mine, sonyń nátıjesinde elge qos medalmen oralyp kele jatyrmyz. Jan-jaqty qoldaǵany úshin Qazaqstan ústel tennısi federatsııasynyń prezıdenti Danııar Abýlǵazınge, Qaraǵandy oblystyq federatsııasynyń tóraǵasy Jeńis Qasymbekke alǵysymdy bildiremin», dedi Alannyń bapkeri Elmıra Álıeva.
Eske sala keteıik, budan buryn ústel tennısinen qazaqstandyqtyń alǵash ret álem chempıonatynda altyn alǵanyn jazǵan bolatynbyz.
Qasym-Jomart Toqaev tennısshi Alan Qurmanǵalıevti jeńisimen quttyqtady.
