Ustazǵa tynymsyz izdenis pen talmas talap qajet-Aıagóz Qaparova
KÓKShETAÝ. QazAqparat - Ustazǵa tynymsyz izdenis pen talmas talap qajet. Osyndaı ómirlik ustanymy bar aqmolalyq ustaz Aıagóz Qaparova eńbekke degen qulshynysy men tabandylyǵynyń arqasynda bıik belesterge qol jetkizip otyr, dep habarlaıdy QazAqparat tilshisi.
Qoǵamda qandaı mamandyq ıesi bolsa da bári ustazdan bilim, tálim-tárbıe alady. Sondyqtan da ol árdaıym qasıetti tulǵa retinde erekshelenedi. Bilim kóshin jyljytyp, el qatarly eńbek etip otyrǵan ulaǵatty jannyń biri – Aıagóz Qaparova der edik.
Búginde joǵary jáne orta arnaýly oqý ornyn bitirip, pedagogıkalyq mamandyq alǵan kóptegen bilimdi jastarymyzdyń eńbek jolyn basqa saladan bastaǵanyn kezdestirip jatamyz. Al, munyń sebebi nede jatyr? Múmkin mamandyǵynan adasqandar ma, bálkim... Zerendi aýdanyna qarasty, Aqkól orta mektebinde geografııa pániniń muǵalimi Aıagóz Ýálıhanqyzy kerisinshe, ustazdyq joldan baqytyn tapqan jan.
Aıagóz Ýálıhanqyzy 1990 jyly Atbasar aýdanynyń Esengeldi aýylynda qarapaıym otbasynda dúnıege kelgen. Ol 2008 jyly aýyldaǵy orta mektepti aıaqtaǵan soń, Shoqan Ýálıhanov atyndaǵy Kókshetaý memlekettik ýnıversıtetinde oqýǵa túsip, 2012 jyly «Geografııa pániniń muǵalimi» mamandyǵy boıynsha bilim alyp shyǵady.
Búgingi tańda elimizde kózi ashyq, kókiregi oıaý jastarǵa zor úmit artylyp otyr. Ásirese aýyldyq eldi-mekenderde joǵary bilimdi mamandar tapshy. «Dıplommen aýylǵa!» baǵdarlamasy osy olqylyqtyń ornyn toltyrýǵa septigin tıgizýde.
Osy baǵdarlamanyń qatysýshy Aıagóz Ýálıhanqyzy da eńbek jolyn 2012 jyly Zerendi aýdanynyń Aqkól orta mektebinen bastady. Sodan beri mektepte ótetin túrli is-sharalarǵa belsene qatysyp, ózin jaqsy qyrynan kórsetip keledi. Ol sabaqqa jan-jaqty daıyndyqpen keledi. Bilim berýdiń ozyq tehnologııasyn qoldaný arqyly ár sabaǵyn qyzyqty ári tartymdy ótkizýge tyrysady. Oqýshynyń sabaqqa qyzyqtyrý maqsatynda synyptan tys is-sharalardy da jıi uıymdastyrady.
«Súıikti isińniń tereńine boılaǵan saıyn qyzyǵy da, shyjyǵy da molaıa túsedi. Ustazǵa eń basty keregi - tynymsyz izdenis pen talmas talap. Jaýapty jumys bolǵandyqtan, bilim baǵdarlamasyna saı ár sabaqta qazirgi zamańǵy bilim berýdiń ozyq tehnologııasyn qoldanýǵa tyrysamyn», - deıdi muǵalim.
Geografııa pánine degen qyzyǵýshylyǵyn arttyra bilgen úzdik ustazdyń da eńbegi eleńbeı qalǵan emes. Qalalyq jáne oblystyq baıqaýlarda joǵary jetistikterge qol jetkizip júrgen onyń respýblıkalyq «Moe prızvanıe - pedagog» baıqaýynda jeńimpaz atanǵanyn aıtyp ótken artyq emes. Bul árıne, jas maman úshin úlken jetistik.
Bul kúnde jan joldasy Nurjan ekeýi qos ul tárbıelep otyrǵan abzal jan asqan qurmet pen bedelge ıe. Ol sanaly ǵumyryn urpaq tárbıesine arnap, óskeleń urpaqty bilim nárimen sýsyndatýǵa shynaıy atsalysyp keledi.
