Ustazdyq mamandyqta aqyly bólim bolmaýy tıis - Pedagogtik bilim berýdiń respýblıkalyq keńesi
ASTANA. QazAqparat - Ustaz bolatyn bolatyn túlekterdiń barlyǵy shyǵarmashylyq emtıhan tapsyrýy kerek. Bul týraly búgin Pedagogtik bilim berý jónindegi respýblıkalyq keńeste Abaı atyndaǵy Qazaq ulttyq pedagogıkalyq ýnıversıtettiń rektory Serik Pirálıev málim etti.
«Pedagogıkalyq joǵary oqý oryndaryna abıtýrıentterdi qabyldaý tek aqysyz negizde júzege asyrylýy kerek. Aqyly bilim berýden bas tartý qajet. Qabyldaý emtıhanyna deıin pedagogıkalyq joǵary oqý ornyna túsýge nıettiler shyǵarmashylyq emtıhandy tapsyrýǵa mindetti. Bul olardyń pedagogıkalyq qyzmettegi qabilettiligin anyqtaýǵa baǵyttalýy kerek. Mektepti «úzdik» bitirgen túlekter UBT-ny tapsyrmaı, tek shyǵarmalyq emtıhan negizinde qabyldanýy qajet. Osy oraıda úzdik abıtýrıentterdi tartýǵa múmkindik beredi», - dedi ol.
S. Pirálıevtiń sózine qaraǵanda, elimizde pedagogıkalyq mamandyqqa bólinetin granttardyń sany - bes myń. Osy jas mamandardyń barlyǵy oqýdan keıin shaǵyn mektepterge barýyn yntalandyrý mańyzdy.
«Ustaz daıyndaýda tek memlekettik grant negizinde oqytsaq, sonymen qatar burynǵydaı oqý ornyn bitirgen jas mamandardy josparly túrde elimizdiń alys aýyldaryndaǵy mektepterge baǵyttasaq durys bolar edi. ıAǵnı, grantpen oqyǵannan keıin, mınıstrliktiń jibergen mektebinde kem degende úsh jyl eńbek etýi kerek», - dedi rektor.
