Ustazdarǵa syılyq usynǵan jalǵan saıttar aqshańyzdy urlaýy múmkin
ASTANA. KAZINFORM — Ustazdar kúni qarsańynda jalǵan dúkender kóbeıgen, dep habarlaıdy Bas prokýratýranyń baspasóz qyzmeti.
Bas Prokýratýranyń Quqyqtyq statıstıka jáne arnaıy esepke alý jónindegi komıtetiniń Qylmystyq qaýip-qaterlerdiń jáne qoǵamdyq qaýipsizdik táýekelderin boljaý ortalyǵy azamattardy Ustazdar kúni qarsańynda taralyp jatqan jańa alaıaqtyq shema týraly eskertedi.
Sheteldik derekkózderdiń málimetteri boıynsha, alaıaqtar ustazdarǵa arnalǵan tıimdi syılyq usynystary bar jalǵan saıttarǵa siltemeler jiberedi.
— Alaıaqtar aldaý úshin jasandy ıntellekt kómegimen is júzinde joq taýarlardyń sýretterin jasaıdy, al satýshynyń ornyna satyp alýshyǵa chat-bot jaýap beredi. Mundaı saıttar shynaıy dúkenderge uqsas, biraq tólem jasaǵannan keıin satyp alýshynyń aqshasyz da, syılyqsyz da qalý táýekeli bar, — dep eskertti vedomstvo.
Ózińizdi qorǵaý úshin ne isteý kerek?
— kúmándi habarlamalardan kelgen siltemeler boıynsha ótpeńiz jáne nómirlerge qońyraý shalmańyz;
— parolderdi, PIN-kodtardy, bank kartalarynyń CVV-kodtaryn jáne SMS-ten kelgen rastaý kodtaryn aıtpańyz;
— saıttyń shynaıylyǵyna jáne satýshynyń senimdiligine kóz jetkizgenshe deıin aldyn ala tólem jasamańyz;
— tapsyrystar týraly aqparatty satýshynyń resmı saıty nemese qosymshasy arqyly, olardy óz betińizshe ashyp tekserińiz.
— Eger siz karta derekterin berip qoısańyz nemese kúmándi qarajattyń alynyp ketkenin baıqasańyz, dereý bankpen baılanysyp, kartany buǵattańyz jáne bolǵan jaǵdaı týraly polıtsııaǵa habarlańyz, — deıdi mamandar.
Budan buryn Aqtóbede páter almaq bolǵan 59 adam alaıaqtarǵa aldanyp qalǵanyn jazǵanbyz.
