Ustazdarǵa qolaıly jaǵdaı jasaý jumysyn jalǵastyra beremiz - Aımaǵambetov
Іs-shara barysynda Oqý-aǵartý mınıstri Ashat Aımaǵambetov áriptesterin «Úzdik pedagog» ataǵymen quttyqtap, óz isine adaldyǵy men bilim salasyn damytýǵa qosqan úlesteri úshin alǵysyn bildirdi. Sondaı-aq mınıstr ustazdarǵa qıyn bolsa da, biraq uly kásipte jańa tabys men jetistik tiledi.
«Muǵalim mamandyǵy qaı kezeńde bolmasyn eń qasterli mamandyqtardyń biri sanalady. Al búgin, áriptester, sizder Ahmet Baıtursynov, Ybyraı Altynsarın syndy kórnekti aǵartýshylardyń ıgi isin jalǵastyryp kelesizder. Prezıdentimiz Qasym-Jomart Toqaev saılanǵan kúnnen bastap ustazdarǵa úlken kóńil bólip keledi. 2019 jyly «Pedagog mártebesi týraly» zań qabyldandy. Prezıdenttiń tikeleı tapsyrmasy boıynsha jyl saıyn tárbıeshilerdiń, muǵalimderdiń, kolledj oqytýshylarynyń jalaqysy kóterilip keledi. Zań ustazdardy mindetine jatpaıtyn fýnktsııalardan bosatýǵa múmkindik berdi», - dedi ol.
Ashat Aımaǵambetov Prezıdent Joldaýyn júzege asyrý aıasynda 2023 jyldyń qańtarynan bastap tárbıeshiler men muǵalimderdiń jalaqysy taǵy 25 paıyzǵa ósetindigin aıtty.
«Qazir áriptesterdiń kópshiligi aptasyna 6 kún emes, 5 kún jumys isteıdi. Sondaı-aq eńbek ótili 25 jyldan asatyn áriptester arnaıy medaldarmen marapattalady. Al biz budan da qolaıly jaǵdaı jasaý úshin jumysty jalǵastyra bermekpiz. Respýblıkalyq «Úzdik pedagog» baıqaýy óz salasynyń úzdikterin anyqtap, eńbegińizdi, tájirıbeńiz ben bilimińizdi baǵalaýǵa septigin tıgizedi. Sizder kásibı mamansyzdar. Sizderge zor densaýlyq, amandyq tileımin», - dedi mınıstr
Aıta keteıik, baıqaýdyń respýblıkalyq kezeńinde aýdandyq, qalalyq jáne oblystyq kezeńderdiń qorytyndysy boıynsha 123 muǵalim «Úzdik pedagog – 2022» ataǵy úshin synǵa tústi. Olardyń ishinde 64-i úzdik pedagog atandy. Jalpy, baıqaýdyń barlyq kezeńin tsıfrlandyrýdyń arqasynda bıyl baıqaýǵa muǵalimderdiń rekordtyq sany, ıaǵnı 5,5 myńnan astam muǵalim qatysty.
