Ustazdarǵa biliktiligi boıynsha ústemeaqy tóleý qyrkúıekten bastap júrgiziledi
ASTANA. 26 sáýir. QazAqparat /Marlan Jıembaı/ - Ustazdarǵa biliktiligi boıynsha ústemeaqy tóleý qyrkúıekten bastap júrgiziledi. Bul týraly búgin Úkimet otyrysynda qarjy mınıstri Bolat Jámishev málim etti.
«Aǵymdaǵy jyldyń 1 toqsanynda bilim berý salasynda 2011-2020 jyldarǵa arnalǵan QR Bilim berýdi damytý memlekettik baǵdarlamasynyń birinshi kezeńin júzege asyrý boıynsha jumystar jandandy. Ony júzege asyrýǵa 190,2 mlrd. teńge, onyń ishinde 2011 jyly 75,8 mlrd. teńge qarastyrylǵan», - dedi ol.
Qarjy mınıstriniń aıtýynsha, memlekettik baǵdarlama aıasynda oqytýshylar mártebesin arttyrý, atap aıtqanda, mektep ustazdarynyń jáne mektepke deıingi bilim berý oryndarynyń tárbıeshilerine biliktilik sanaty boıynsha ústemeaqy kólemin ulǵaıtý baǵytyndaǵy jumystar qolǵa alynǵan. Sondaı-aq kásibı jáne tehnıkalyq bilim berý uıymdarynda óndiristik oqytýdy uıymdastyrýshylarǵa ústemeaqy belgilengen.
«Atap ótilgen ústemeaqylardy tóleý aǵymdaǵy jyldyń qyrkúıeginen bastap júrgiziledi», - dedi B.Jámishev.
