Ustazdardyń shaǵymynan keıin elordalyq mektepte tekserý júrip jatyr
ASTANA. QazAqparat - Astana qalasy bilim basqarmasy elordadaǵy № 67 mektep ustazdary atynan kelip túsken shaǵym boıynsha arnaıy komıssııa quryp, mektep ujymy men oqýshylardyń ata-analarymen kezdesý ótkizdi.
Bilim basqarmasy atalǵan komıssııanyń jumys qorytyndysy boıynsha Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttigine barlyq shaǵym faktileri boıynsha tekserý júrgizý úshin ótinish jasady. Bul týraly Astana qalasy Bilim basqarmasy basshysynyń orynbasary Ánýar Janǵozın Feısbýk paraqshasynda habarlady.
Eske sala keteıik, buǵan deıin qoǵam belsendisi Aqmaral Omaralınova elordalyq № 67 mektep-gımazııasy dırektorynyń zańdy belden basý áreketine qarsylyq bildirgen ustazdardyń pikiri týraly áleýmettik jelide jazba qaldyrǵan bolatyn.
