Ustazdardyń qoǵamdyq mártebesin mindetti túrde kóteremiz - Prezıdent

ASTANA. KAZINFORM – Ustazdardyń qoǵamdyq mártebesin mindetti túrde kóteremiz. Bul týraly AES boıynsha referendýmda daýys bergennen keıin BAQ ókilderine shaǵyn suhbat bergen Memleket basshysy Qasym-Jomart Toqaev aıtty.

«Siz halyqaralyq pándik olımpıadalardyń jeńimpazy atanǵan talanatty oqýshylarǵa qoldaý kórsettińiz. Jas shahmatshylardyń da ár qadamyn nazarda ustap, qoldap kele jatqanyńyzdy bilemiz. Jalpy, mundaı qadamnyń astarynda qandaı mán bar?» - dep surady BAQ ókilderi Prezıdentten.

«Máni tereń, sebebi men jalpy jastardy qoldap, únemi aıtyp kelemin. Memleketimizdiń keleshegi jastardyń qolynda. Bul - jaı uran sóz emes. Bul - bizdiń basty saıasatymyz. Sondyqtan keleshekte de jastardy qoldaımyz, járdem beremiz. Ásirese, daryndy jastardy qoldaýymyz kerek. Keshe ǵana muǵalimderge, ustazdarǵa marapattar berdim. Muǵalimder - qoǵamymyzdyń ozyq tulǵalary. Olar daryndy jastarǵa bilim berip otyr. Jastardy bolsyn, muǵalimderdi bolsyn biz, memleket barlyqtaryn qoldaımyz. Bul - bir. Ekinshiden, ustazdar qoǵamymyzdyń basty keıipkeri bolýy kerek. Bul - jaı sóz emes. Bul – saıasat. Sondyqtan olarǵa járdem berip, muǵalimderdiń, ustazdardyń bedelin arttyryp, qoǵamdyq mártebesin mindetti túrde kóteremiz», - dedi Qasym-Jomart Toqaev.

Memleket basshysy Qasym-Jomart Toqaev elimizde atom elektr stansasyn salý boıynsha referendýmda daýys berdi. 

Eske salaıyq, búgin qazaqstandyqtar atom elektr stantsııasyn salý máselesi boıynsha jalpyulttyq referendýmda daýys beredi.

Ortalyq referendým komıssııasy tóraǵasynyń orynbasary Konstantın Petrov eldiń barlyq óńirinde Qazaqstanda atom elektr stantsııasyn salý máselesi boıynsha jalpyulttyq referendým bastalǵanyn resmı málim etti.

1 shildedegi jaǵdaı boıynsha el kóleminde 12 176 968 adam referendýmda daýys berýge haqyly.