Ustazdar memleket qoldaýyn úlken jaýapkershilikpen qabyldaýy tıis -senator
KÓKShETAÝ. QazAqparat - QR Parlamenti Senatynyń depýtaty Baqytjan Jumaǵulov jumys saparymen Aqmola oblysynyń Býrabaı aýdanynda boldy, dep habarlaıdy QazAqparat tilshisi.
Sapar barysynda senator aldymen Şýche qalasyndaǵy №2 orta mektepte bolyp, bilim berý baǵytynda atqarylyp jatqan jumystarmen tanysty.
Óz kezeginde senator Baqytjan Jumaǵulov jaqynda qabyldanǵan «Pedagog mártebesi týraly» zań bilim berý salasy qyzmetkerleriniń quqyqtary men áleýmettik qorǵalýyn qamtamasyz etýmen qatar, elimizdegi pedagogıka qaýymynyń mártebesin arttyrýǵa jáne muǵalim bedelin kóterýge baǵyttalǵanyn túsindirdi.
«Ustazdarymyz memlekettiń osyndaı qoldaýyn úlken jaýapkershilikpen qabyldaýy tıis. «Pedagog mártebesi týraly» zańnyń odan ári jumys istep ketýi ózderińizge baılanysty. Ustazdar qalaı ári qaraı alyp ketedi?! Ustazdardyń ótkizip jatqan sabaqtary álemdik deńgeıge saı bolýy kerek. Osyǵan úlken jaýapkershilikpen qarap jatqandaryńyz baıqalady», - dedi Baqytjan Jumaǵulov.
Sonymen qatar, senator Aqmola oblysy ákiminiń orynbasary Aına Mysyrálimovamen birge Şýche qalasyndaǵy joǵary tehnıkalyq kolledji, joǵary pedagogıkalyq kolledj tárizdi birqatar arnaıy orta bilim berý uıymdarynda bolyp, materıaldyq-tehnıkalyq jabdyqtalýyna nazar aýdardy. Kolledjdiń oqytýshylyq quramy jáne stýdenttermen kezdesip, jaǵdaılaryn surap bildi. Senator pedagogtardyń quqyqtaryn keńeıtý, aýyrtpalyqty azaıtý, muǵalim qyzmetine qoıylatyn talaptardy kúsheıtý, materıaldyq emes yntalandyrý men materıaldyq turǵyda qoldaý tetikterin egjeı-tegjeıli túsindirdi.
Osyndaı kezdesý Býrabaı aýdandyq jumyspen qamtý, halyqqa arnaıy áleýmettik qyzmet kórsetý ortalyqtarynda ótti. Kezdesýde jumys isteıtin azamattarǵa áleýmettik járdemaqy tóleý, jumysqa ornalasý, asyraýshysynan aıyrylý, júkti bolýy men bosanýy jáne 1 jasqa deıingi bala kútimi jónindegi baptar egjeı-tegjeıli túsindirildi.
Ataýly áleýmettik kómek taǵaıyndaýda engizilgen ózgerister men bul baǵyttaǵy máseleler týraly Býrabaı aýdandyq jumyspen qamtý ortalyǵynyń dırektory Kenje Imanqulova aıtyp berdi.
