Ustazdar kúni qarsańynda elordada 1900-ge jýyq turǵyn baspanaly boldy
NUR-SULTAN. QazAqparat - Ustazdar kúni qarsańynda Nur-Sultan turǵyndary qonys toıyn toılap jatyr! Páter kiltterin kezekte turǵan qala turǵyndarynyń bir bóligi, sondaı-aq halyqtyń áleýmettik osal toptary sanatyndaǵy azamattardyń kezekti bóligi aldy. «Nurly jer» memlekettik baǵdarlamasy aıasynda «Otaý» kóppáterli turǵyn úı kesheni qoldanysqa berildi, dep habarlaıdy QazAqparat elorda ákimdiginiń resmı saıtyna silteme jasap.
Elorda ákiminiń orynbasary Nurlan Nurkenov «Otaý» kóppáterli turǵyn úı keshenindegi páterlerdiń kiltin tabys etti.
«Muny turǵyn úı kesheni degennen góri shaǵyn aýdan desek te bolady. Bul aýmaqta kelesi jyly jańa mektep boı kóteretin bolady. Qazirdiń ózinde jańa avtobýs baǵyty uıymdastyryldy. Balabaqsha, medıtsınalyq ortalyq sekildi basqa da áleýmettik mańyzdy uıymdar boı kóteredi. Abattandyrý jumystary júrgiziledi. ıAǵnı turǵyndardyń qolaıly ómir súrýine barynsha jaǵdaı jasalady», – dedi elorda ákiminiń orynbasary Nurlan Nurkenov.
Osylaısha, Almaty aýdanynda ornalasqan «Otaý» turǵyn úı kesheniniń páterleri «Nurly jer» memlekettik baǵdarlamasy aıasynda «Otbasy bank» júıesi arqyly paıdalanýǵa berildi. Sý jańa keshende 1 884 páter bar.
Búgin qonys toıyn toılap jatqandardyń biri – elordadaǵy «№65 mektep-gımnazııasynyń oqytýshysy Aǵıla Ǵanıqyzy.
«Qaladaǵy záýlim kópqabatty úılerdi kórip, «Shirkin, meniń de óz baspanam bolsa» dep qatty armandaıtynmyn. Nıet etseń, túbi jetesiń ǵoı. Endi búgin, mine, páterge qol jetkizdim», – deıdi jas ustaz qýanyshtan júzi bal-bul janyp.
Memleket basshysynyń tapsyrmasy boıynsha elordada qoljetimdi jeńildikti turǵyn úı kólemin ulǵaıtý boıynsha júıeli jumys júrgizilýde. Bıyl Nur-Sultanda 10 myń jeńildikti áleýmettik páter salynady. Tek sońǵy 3 jylda qoljetimdi turǵyn úı sany 5,5 eseden astam ulǵaıdy.
Mysaly, 2018 jyly 1800 áleýmettik páter, 2019 jyly 2 900 áleýmettik páter, 2020 jyly 7 000-nan astam páter salynyp, paıdalanýǵa berildi.
Sondaı-aq, Elbasynyń bastamasymen qolǵa alynǵan «Jumys isteıtin jastarǵa jalǵa beriletin turǵyn úı» baǵdarlamasy bıyl da jalǵasady.
