Ustazdar kásipodaǵy 113 qyzmetkerdi zańsyz jumystan shyǵarylýdan qorǵap qaldy
NUR-SULTAN. QazAqparat - 2018 jyly Qazaqstandyq salalyq bilim jáne ǵylym qyzmetkerleriniń kásiptik odaǵy jumys berýshiler tarapynan bolǵan 2900 eńbek zańnamasynyń buzylýyn anyqtady, dep habarlaıdy atalǵan uıymnyń baspasóz qyzmeti.
Bul zań buzýshylyqtarǵa qatysty eńbek zańnamasynyń buzylǵandyǵy týraly jáne ony qalpyna keltirý boıynsha jumys berýshilerge 1502 aryz jiberildi. Nátıjesinde qalpyna keltirilgen quqyq buzýshylyqtar boıynsha 1390 jaýap kelip tústi.
Ustazdar kásipodaǵynyń bastamasymen bilim salasynyń 44 qyzmetkeri jumysqa qaıta ornalasty. Onyń 6-aýy sot organdary arqyly qaıtadan jumysqa ornalasty.
Budan bólek osy salanyń 113 qyzmetkerin zańsyz jumystan bosatýǵa jol berilmedi.
Aıta ketý kerek, kásipodaq keńsesine onyń múshelerinen kóptegen aryz-shaǵymdar kelip túsýde. Tek byltyr hat arqyly 2 074 shaǵym túsip, eńbek qatynastary máselesi boıynsha 20 790 aqyl-keńes berildi. 2017 jyly da hat arqyly 2349 aryz-shaǵym túsip, 18 878 aqyl-keńes berilgen bolatyn.
Esterińize sala ketsek, Qazaqstandyq salalyq bilim jáne ǵylym qyzmetkerleriniń kásipodaǵy Qazaqstandaǵy eń iri qoǵamdyq uıym jáne quramyna 700 myńnan astam kásipodaq múshesi kiredi.
