Ustaz júktemesi: Bilim salasynda 70-ten astam tsıfrlyq júıe qoldanylyp kelgen
ASTANA. KAZINFORM – Bilim berý salasyndaǵy 70-ten astam tsıfrlyq júıe birizdendirilip, Ulttyq bilim berý derekter bazasymen ıntegratsııalanady. Oqý-aǵartý mınıstri Juldyz Súleımenova Úkimet otyrysynda pedagog júktemesi qalaı jeńildeıtinin túsindirdi.
Oqý-aǵartý mınıstrligi orta bilim berý salasyndaǵy tsıfrlyq júıelerdiń tıimdiligine baǵalaý júrgizgen. Mundaǵy maqsat – qaıtalanatyn fýnktsııalardy anyqtaý, derekter almasýdy jolǵa qoıý jáne shyǵyndardy ońtaılandyrý.
– Baǵalaý nátıjesinde elektrondyq jýrnaldar men kúndelikterdi júrgizýge, oqýshylardyń bilimin baǵalaýǵa, memlekettik qyzmetter kórsetýge jáne bilim alýshylardyń esebin júrgizýge arnalǵan 70-ten astam tsıfrlyq júıe men servıs qoldanylatyny anyqtalǵan. Bir óńirde orta eseppen 10-ǵa jýyq júıe bar, – dep atap ótti J. Súleımenova.
Osyǵan baılanysty mınıstrlik biryńǵaı tsıfrlyq arhıtektýra qalyptastyryp jatyr.
Bir málimetterdi birneshe ret engizý qajettigin boldyrmaý úshin qoldanystaǵy barlyq LMS-júıelerin Ulttyq bilim berý derekter bazasymen ıntegratsııalaý mindetteledi.
– Elektrondyq jýrnaldar, bilim berý platformalary, sabaqqa qatysýdy, tamaqtanýdy jáne kirýdi baqylaýdy esepke alý júıeleri qajetti málimetterdi Ulttyq bilim berý derekter bazasymen ıntegratsııalaý arqyly aqparat qaıtalanbaı alynady, – dep túsindirdi sala basshysy.
Oqý-aǵartý mınıstrligi jasandy ıntellektini orta bilim berý júıesine engizýge, onyń ishinde qala men aýyl mektepteri arasyndaǵy bilim berý sapasyndaǵy alshaqtyqty qysqartýǵa, sondaı-aq pedagogterdiń ákimshilik júktemesin azaıtýǵa baǵyttalǵan Ulttyq bilim berý JI platformasyn qurýda.
– Mınıstrlik pedagogterge qysym kórsetý, olardyń ar-namysy men qadir-qasıetine nuqsan keltirý, sondaı-aq muǵalimder men oqýshylar arasyndaǵy janjaldarǵa qatysty jaǵdaılardy qarastyrady. Árbir ótinishti obektıvti ári jan-jaqty qaraýǵa, mektep pen ata-analar arasyndaǵy ózara is-qımyldy jetildirýge, sondaı-aq bilim berý protsesine qatysýshylardyń jaýapkershiligin arttyrýǵa erekshe nazar aýdarylady, – dedi J. Súleımenova.
Taldaý nátıjeleri boıynsha tıisti normatıvtik quqyqtyq aktiler jetildiriledi.
Keshe Prezıdent Qasym-Jomart Toqaev óz Joldaýynda ustazdyń bilim berýine kedergi keltiretin basy artyq jumystardy doǵarý keregin aıtqan edi.
Endi muǵalimder júrgizýge mindetti qujattar sany 25-ten 5-ke deıin qysqarady.
