Ustaz - uly esim
ASTANA. KAZINFORM — Búgin elimizde dúnıedegi eń asyl, jaýapty ári mańyzdy mamandyq ókilderi – muǵalimder kúni. Bul kún elimizde biraz ýaqytqa deıin qazan aıynyń birinshi jeksenbisinde atalyp ótip keldi. Al 2023 jyly Úkimet qaýlysymen 5 qazanǵa bekitilgen edi.
Sońǵy bes jylda elimizde bilim-ǵylymnyń damýyna basa mán berilip, bilim salasyna bólinetin qarjy úsh ese artty. 1 200 jańa mektep ashyldy. «Keleshek mektepteri» ulttyq jobasy júzege asyrylyp jatyr. Osy joba boıynsha zaman talabyna saı 150 bilim oshaǵy salyndy. Sondaı-aq osyndaı 67 mekteptiń qurylysy júrgizilip jatyr.
Pedagogterdiń mártebesin kóterip, áleýmettik jaǵdaıyn jaqsartý úshin naqty sharalar qolǵa alyndy. Arnaıy zań qabyldandy. Búginde ustazdardyń jalaqysy 2 ese ósti. Qazirgi tańda 500 myńnan astam ustazǵa ústeme aqy tólenedi. 2021 jyldan bastap alǵash ret pedagogterge «Qazaqstannyń eńbek sińirgen ustazy» memlekettik nagradasy berile bastady. Búginde bul mártebeli ataqty 79 ustaz aldy. Byltyr eki ustaz «Qazaqstannyń Eńbek Eri» atandy. Bul barsha pedagogter qaýymyna kórsetilgen zor qurmettiń belgisine aınaldy. 2012 jyldan beri muǵalimderdiń eńbegin baǵalaý úshin «Úzdik pedagog» baıqaýy ótkizilip keledi. Búginge deıin bul ataqqa elimizdiń túkpir-túkpirinen 752 muǵalim ıe boldy. Pedagogterdiń kásibı deńgeıin arttyrýǵa yqpal etetin baıqaý jeńimpazdary qurmetti ataq pen 1 000 AEK (3 932 000 teńge) mólsherinde aqshalaı syılyq alady. «Bilim berýdegi ózgeristerdiń myń kóshbasshysy» jobasy qolǵa alyndy. Osy jobaǵa qatysqan 332 maman mektep dırektory bolyp taǵaıyndaldy. Muǵalimder óz mindetine kirmeıtin artyq jumystan bosatyldy.
Mine, osyndaı sharalardyń nátıjesinde muǵalim bolǵysy keletin jastardyń qatary artty. Máselen, 2004-2005 oqý jylynda 1 800-ge jýyq «Altyn belgi» ıegeri pedagogıkalyq mamandyqqa oqýǵa tússe, bıyl 2 myńnan astam úzdik túlek ustaz mamandyǵyn tańdady. Bul – osy jyly oqý bitirgen «Altyn belgi» ıegerleriniń 23 paıyzǵa jýyǵy. Bıyl muǵalimder daıarlaý úshin 13 myńnan astam grant bólindi. Bul – elimizdegi barlyq granttyń besten birine jýyǵy. Pedagog mamandyǵy boıynsha oqyp jatqan stýdentterdiń shákirtaqysy sońǵy bes jylda 2 ese kóbeıip, jańa oqý jylynan bastap 84 myń teńgege jetti. 2025-2026 oqý jylynda qazaqstandyq bilim berý uıymdaryna 10 myńnan astam jas pedagog jumysqa qabyldandy.
Aıta keteıik, 1 qazanda ustazdar qaýymyn quttyqtaǵan Memleket basshysy Qasym-Jomart Toqaev muǵalimderdiń kásibı merekesi elimizde erekshe atalyp ótetinin jetkizip, ustazdar qaýymyna zor qurmet kórsetiletinin aıtty.
– Mirjaqyp Dýlatuly «Halyqqa eń paıdaly adam – muǵalim» degen. Muǵalim – ár azamat úshin óte qadirli tulǵa. Basqa sózben aıtqanda, muǵalim – árbir balaǵa ómir jolyn kórsetedi. Ustaz – tálim-tárbıe men bilimniń qaınar kózi. Kez kelgen qoǵamnyń kemeldigi, órkenıettiligi ustazǵa degen qatynasymen ólshenedi. Ustazyn ulyqtaǵan eldiń urpaǵy sanaly, bolashaǵy jarqyn bolary haq. Sebebi ár muǵalimniń eńbegi – eren, elimizdiń damýyna qosqan úlesi – orasan. Sondyqtan búgin men bilim berý salasynda eńbek etip júrgen barsha azamatqa shynaıy rızashylyǵymdy bildiremin, – dedi Prezıdent.
Ótken aıdyń sońynda 2 jyldan astam ýaqyt Oqý-aǵartý mınıstri bolǵan Ǵanı Beısembaev qyzmetinen bosatylyp, onyń ornyna Májilis depýtaty Juldyz Súleımenova taǵaıyndaldy. Jańa mınıstrdi Memleket basshysy Qasym-Jomart Toqaev Aqordada 29 qyrkúıekte qabyldady. Kezdesýde Prezıdent memlekettik jáne salalyq baǵdarlamalar men ulttyq jobalardy tıimdi iske asyrýdyń mańyzdy ekenin atap ótti. Sondaı-aq Memleket basshysy bilim berý sapasyn arttyrý, saladaǵy ózekti máselelerdi ýaqtyly sheshý jáne azamattarmen tyǵyz qarym-qatynas ornatý qajettigine nazar aýdaryp, naqty mindetter júktedi.
Juldyz Súleımenova kezdesýden shyqqannan keıin Prezıdent qandaı naqty tapsyrmalar júktegenin aıtty.
- Maǵan berilgen naqty tapsyrma – bilim sapasyn arttyrý, qala men aýyl balalary arasyndaǵy bilim teńsizdigin tolyqqandy, meılinshe joıý. Sondaı-aq bilim mazmunyn basqa jerden kóshirip almaı, naqty qalyptasqan akademııalyq erekshelikterimiz ben basymdyqtarymyzdy zerdeleı otyryp jańǵyrtýdy tapsyrdy. Munan bólek, búgingi zamanaýı tehnologııalarǵa básekelestikti damytatyn, balalarymyzdyń ozyq oıyn damytatyn júıeli, sapaly bilim berý júkteldi. Endigi negizgi mindetim – Memleket basshysynyń úlken senimin aqtaý, bergen tapsyrmalaryn sapaly oryndaý, elimizge adal qyzmet etý, - degen edi Oqý-aǵartý mınıstri.
Esterińizge sala ketsek, 5 qazanda álemniń 100-den astam eli Dúnıejúzilik muǵalimder kúnin atap ótedi. Muǵalimder kúni – bilim berý salasyndaǵy qyzmetkerlerdiń barlyǵyna ortaq kásibı mereke. Bul kúni ustazdar qaýymynyń qoǵam damýyndaǵy róli men eńbegi, oǵan qosatyn zor úlesi atalyp ótedi.
Dúnıejúzilik muǵalimder kúnin bekitýge 1966 jyly 5 qazanda Parıjde ótken Muǵalimderdiń mártebesi týraly arnaıy úkimetaralyq konferentsııa uıytqy boldy. Nátıjesinde ıÝNESKO men Halyqaralyq eńbek uıymynyń ókilderi «Muǵalimderdiń mártebesine qatysty usynystar» qujatyna qol qoıdy. Dúnıejúzilik muǵalimder kúni alǵash ret 1994 jyly 5 qazanda atap ótildi.