USTAZ HUB: 300 muǵalim tegin sheberlik sabaqtarynda bas qosty
ASTANA. KAZINFORM – Astana qalasynda 300 muǵalimniń basyn qosqan USTAZ HUB is-sharasy ótti. Bilim salasy qyzmetkerlerine ózara tájirıbe almasýǵa múmkindik beretin áleýmettik joba USTAZ PRO jáne QUNDYLYQ kásibı bilim berý ortalyqtarynyń bastamasymen uıymdastyryldy.
USTAZ HUB – Qazaqstan mektepterin damytýǵa yntaly muǵalimderdi biriktiretin biregeı joba. Sheberlik sabaqtary aıasynda muǵalimder ózara ıdeıa men tájirıbe almasyp, bilim berý salasyndaǵy jańalyqtarmen tanysa alady. Uıymdastyrýshylar aldaǵy ýaqytta jobanyń aýqymyn keńeıtip, Qazaqstannyń ártúrli óńirindegi muǵalimderdi qamtýǵa nıetti.
«Bizdiń basty maqsatymyz – muǵalimderdi bilim berý salasyndaǵy sońǵy jańalyqtardan habardar etip, tájirıbe almasýǵa jáne jańa nárseni úırenýge múmkindik beretin dostyq qaýymdastyq qurý», - deıdi uıymdastyrýshylar.
USTAZ HUB jobasy ótken jyldyń jeltoqsanynda bastalǵan bolatyn. Osymen ekinshi ret uıymdastyrylyp otyrǵan is-sharada bilim salasynyń ártúrli baǵytynda jumys isteıtin ekspertter sóz sóılep, biregeı tájirıbesin bólisti. Olardyń qatarynda Smartestprep negizin qalaýshylardyń biri jáne basshysy Laýra Vaıgorova, USTAZ PRO biliktikti arttyrý ortalyǵynyń ádisker-treneri Altyn Amanova, Riviera halyqaralyq mektebiniń gýmanıtarlyq ǵylymdar departamentiniń meńgerýshisi Aıda Ánýarbek, QUNDYLYQ muǵalimderdiń biliktigin arttyrý ortalyǵynyń treneri Saǵadat Almaǵambetov jáne Q.Sátbaev atyndaǵy BINOM mektebiniń dırektory Quralaı Baıtajıkova bar.
«Bul bastama jaıly estigen kúnnen bastap, qoldaý bildirdim. Óıtkeni osyndaı beıresmı qaýymdastyq arqyly ustazdarǵa bir-birinen úırene alatyn qolaıly atmosfera qurýdyń qanshalyqty mańyzdy ekenin túsinemin. Bul jolǵy basqosý da paıdaly tájirıbege toly boldy. Ár muǵalim óziniń biregeı tájirıbesin bólisetin bolsa, mektep qaýymdastyǵy da úzdiksiz damýda bolady», - dep bólisti Quralaı Baıtajıkova.
Spıkerler mektep ujymy men oqýshylardyń motıvatsııasyn arttyrý joldaryn túsindirip, qazirgi muǵalim úshin kóptildik pen áleýmettik jelini qoldana bilý mashyǵynyń mańyzyna toqtaldy. Іs-sharanyń negizgi bóliminen keıin qatysýshylar birneshe topqa bólinip, naqty taqyryptar boıynsha tájirıbe almasty.
