Ustaz bolý otbasylyq dástúrimizge aınalǵan - Alfııa Aksenova
Alfııa Aksenova Batys Qazaqstan oblysynyń týmasy. 22 jyl boıy ustazdyq etip keledi. Ulty basqa bolsa da qazaq tilin erkin biledi. Ol búgin elordaǵa arnaıy kelip, Memleket basshysynyń qatysýymen ótken respýblıkalyq pedagogter sezine saltanatty qatysty. QazAqparat tilshisi shalǵaıdaǵy aýyl muǵalimin áńgimege tartqan edi.
«Respýblıkalyq sezge qatysý – árbir ustaz úshin mártebe. Prezıdenttiń búgingi baıandamasy barlyq ustazǵa shabyt berdi dep oılaımyn. Zor áser aldym, sebebi Memleket basshysy saladaǵy birqatar máseleni kóterdi. Prezıdent bizdiń qoǵamdaǵy rólimiz ben jetistikterimizdi de umytpady. Sonymen qatar, bolashaqtyń tapsyrmalaryn aıqyndap, ustazdarǵa júkteletin mindetterdi atady. Búgingi sezden ár ustaz kóp málimet aldy dep esepteımin. Maǵan taǵy bir unaǵan tusy – aýyl mektepterine qala mektepterimen teń jaǵdaı jasaý týraly tapsyrmasy, - dep ustaz áserimen bólisti. - Memleket bilim berý sapasyn arttyrý baǵytynda ustazdardyń mártebesin kóterip, qoldaý kórsetip jatyr. Onyń ishinde materıaldyq-tehnıkalyq turǵydan, ádistemelik nusqaýlyqtar jáne taǵy basqa. Ustazdardyń eńbegi elenip jalaqy máselesi de oń sheshimin tapty. 5 qazan ustazdar kúni merekesine oraı elordaǵa bizdiń shaqyryp jatyr. Erteń Memleket basshysynyń qatysýymen merekelik shara ótpek. Jıyn aıasynda bizdi Astanadaǵy bilim akademııasy, kórmeler, kitaptar úıine, STEM mektebine baryp atalǵan mekemelerdiń qyzmetimen tanystyq. Sonymen qatar merekelik kontsertter ótip jatyr. Prezıdenttiń qatysýymen ótetin aıtýly sharaǵa qatysý biz úshin mártebe jáne qýanysh».
Aıta ketsek, Alfııa Aksenova Batys Qazaqstan oblysy Bókeı ordasy aýdany Han ordasy aýylynan kelgen. M. Ótemisuly atyndaǵy pedagogıkalyq ınstıtýtty támamdap, muǵalim bolyp aýylǵa barǵan ol Jáńgir han atyndaǵy mektepte 22 jyl boıy ustazdyq etip keledi. Joǵary sanatty pedagog-zertteýshi.
«Ustaz bolý otbasylyq dástúrimizge aınalǵan. Bizdiń otbasymyzdy pedagogter dınastııasy deýge bolady. Anam – ustaz, eki baýyrym da – ustaz. Osy joldy naqty tańdaýyma anam men alǵashqy ustazym yqpal etti», - dedi Alfııa Aksenova suhbat barysynda.
Ulty tatar batysqazaqstandyq ustaz qazaq tilin týǵanynan biledi. Sebebi, qazaqı aýylda týyp, sol ortada ósken. Memlekettik tilde erkin sóılep qana qoımaı, qazaq tili men ádebıeti páninen sabaq beredi. Orys, aǵylshyn jáne tatar tilderin de meńgergen. Tájirıbeli muǵalim osy joldy tańdaǵysy keletin jastarǵa keńes berdi.
«Jastarǵa aıtarym, mamandyqty tańdar aldynda «Men ustaz bola alam ba? Meniń boıymda ustazdyq qasıet bar ma?» dep oılanýy kerek. Bizdiń mamandyqta bilimnen buryn balany jaqsy kórý, onyń júregine jol taba bilý mańyzdy. Ekinshiden, mamandyqqa adal bolýy kerek. Ult ustazdary Ahmet Baıtursynuly, Y. Altynsarın sekildi tulǵalardyń izin jalǵastyrý – erekshe qurmet ári jaýapkershilik. Orta býyn ustazy retinde aıtarym, jas ustazdardyń ishinde janyp turǵandar bar. Bul qýantady. Elimizde ustazdar mártebesi resmı bekitildi, endi muǵalimder soǵan saı bolýy kerek. Sol sııaqty jas ustazdar etıkany saqtaýy kerek, ol óziniń ustaz ekenin, kópke úlgi tulǵa ekenin umytpaý qajet», - dedi A. Aksenova.