Ustaz bedelin arttyrý úshin pedagogıka mamandyǵynda oqıtyn stýdentterdiń shákirtaqysyn eki ese arttyrý kerek - QR Bilim jáne ǵylym mınıstri
ALMATY. 27 mamyr. QazAqparat - /Ádilet Musahaev/ Elimizdegi pedagogıkalyq kadrlar daıyndaıtyn bilim ordalarynyń sanyn qysqartyp, olardyń eń negizgilerin, naǵyz úzdikterin ǵana qaldyrý qajet.
Bul jaıynda QR Bilim jáne ǵylym mınıstri Baqytjan Jumaǵulov búgin Almatyda QazUÝ-dyń oqytýshy-professorlar quramymen kezdesý barysynda aıtty.
Ol ustaz mártebesin arttyrý, pedagogıkalyq mamandardy daıyndaý máselelerine de toqtalyp ótti. «Ustaz bedelin arttyrý úshin bul mamandyqta oqıtyn stýdentterdiń shákirtaqysyn basqa mamandyq ıelerimen salystyrǵanda eki ese arttyrýdy jáne osy mamandyqty tańdap júrgen talapkerlerdi arnaıy talaptardan, synaqtardan ótkizýdi qolǵa alý kerek», - deıdi mınıstr.
Sonymen qatar ustazdarǵa bilim men ǵylymdy damyta otyryp, tárbıe jumystaryn da nazardan tys qaldyrmaı, basty nazarda ustaýdy mindettegen mınıstr ustaz, muǵalimderdi úsh satyly dárejede qaraý durys degen sheshimin aıtty. Onda birinshi dárejeli ustaz eńbekaqysyna qosymsha júz paıyz ústemaqy, ekinshi dárejeli ustazǵa jetpis, al úshinshi dárejeli ustazǵa otyz paıyz ústemaqy qosý oılarymen bólisti.
Ustaz - balalardyń ata-anasynan keıingi orynda turǵan tárbıeshisi. Ustaz - bala tárbıesinde, oqýshy, stýdent tárbıesinde asa mańyzdy maman. Endeshe, QR Bilim jáne ǵylym mınıstri oqytýshy-professorlarǵa, muǵalimderge qoıyp otyrǵan talap ta, júktelgen mindet te ult áleýetin arttyryp, básekege qabiletti mamandar daıyndaýǵa asa qajet talaptar ekendigi daýsyz.
Mınıstrmen kezdesý barysynda QazUÝ-dyń fakýltet dekandary, ınstıtýt dırektorlary sóz alyp, aldaǵy maqsat mindetterdi atqarýǵa saqadaı saı ekendikterin jetkizdi.
