Ustalǵan QAJ komıtetiniń qyzmetkeri zattaı aıǵaqtardy joıyp úlgergen

ASTANA. QazAqparat - Aqtóbe oblysynan Aqmola oblysyndaǵy túzeý mekemesine sottalǵan adamdy aýystyrýǵa ashqa surady degen kúdikpen Qylmystyq atqarý júıesiniń qyzmetkeri ustaldy. Bul týraly Astanada ótken brıfıngte QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Janna Bastarova málim etti, dep habarlaıdy QazAqparat.

«Sybaılas jemqorlyqqa qarsy is-qımyl ulttyq bıýrosynyń elordalyq departamentimen jasyryn tergeý áreketteri nátıjesimen, QR Іshki ister mınıstrliginiń Qylmystyq-atqarý júıesi komıtetiniń Arnaıy esep bólimshesiniń basshysy qyzmettik babyn paıdalana otyryp, alaıaqtyq jasaýda áshkerelendi. Ol elordadaǵy bir dámhana janynda óziniń avtokóliginde deldal arqyly sottalǵan adamdy Aqtóbe oblysyndaǵy túzeý mekemesinen Aqmola oblysyndaǵy túzeý mekemesine aýystyrý úshin 2 800 AQSh dollaryn (bul 1 mln tengege jýyq-avt.) alǵan. Talap etilgen aqshanyń jalpy somasy 6800 AQSh dollaryn quraǵan. Kúdikti ustaý barysynda Ulttyq bıýro qyzmetkerlerine qarsylyq kórsetken, qylmys ornynan boı tasalaýǵa áreket jasaǵan jáne aqsha túrindegi zattaı aıǵaqtardyń jartysyn joıǵan», - dedi J. Bastarova.

Resmı ókildiń aıtýynsha,  qazirgi kezde faktilerdiń bultartpastyǵyn eskere otyryp, ol tolyǵymen óz kánisin moıyndady, tergeýmen árekettesýge ynta bildirdi. Sot sanktsııasymen kúdiktige qatysty úıqamaq túrindegi shara qoldanyldy.

«Laýazymdy tulǵaǵa qatysty qylmystyq is jedeldetilgen sotqa deıingi tergeý tártibimen aıaqtaldy jáne Astana qalasynyń prokýratýrasyna aıyptaý aktisimen joldandy», - dep naqtylady ol.