Ustalǵan Ádilet mınıstrliginiń burynǵy basshysy Marat Beketaev bolýy múmkin – derekkóz

Búgin Sybaılas jemqorlyqqa qarsy qyzmet laýazymdyq ókilettikterin asyra paıdalandy degen kúdikpen burynǵy Ádilet mınıstrin ustaǵany belgili boldy. Kazinform agenttiginiń derekkózi habarlaǵandaı, ustalǵan azamat burynǵy Ádilet mınıstri Marat Beketaev bolýy múmkin. 

Antıkordyń baspasóz qyzmetinen habarlaǵandaı, Memleket basshysynyń zańsyz shyǵarylǵan aktıvterdi izdeý jáne qaıtarý jónindegi tapsyrmasyn oryndaý maqsatynda burynǵy Ádilet mınıstri laýazymdyq ókilettikterin asyra paıdalandy degen kúdikpen ustalǵan.

Vedomstvonyń málimetinshe, ol talap etilmegen qyzmetterdi kórsetýge jyl saıyn kelisimshart jasasý arqyly keıbir kompanııalardyń múddesin qoldaǵan. Tıisinshe, memleketke asa iri kólemde zalal keltirgen.