Ýst-Lýgada ustalǵan qazaqstandyqtardyń qazirgi jaǵdaıy qalaı - SІM túsiniktemesi
ASTANA. KAZINFORM – Qazaqstannyń Sankt-Peterbýrg qalasyndaǵy Bas konsýldyǵy Ýst-Lýgadaǵy vahtalyq kentte bolǵan oqıǵaǵa qatysty túsinikteme berdi.
2026 jylǵy 28 naýryzda Bas konsýldyq qyzmetkerleri atalǵan kentte jumys isteıtin Qazaqstan azamattarymen, onyń ishinde turmystyq janjal saldarynan ustalǵan azamattarmen kezdesý ótkizdi.
Konsýldyq málimetinshe, vahtalyq kentte shamamen 15 myń adam turady. Olardyń barlyǵy Reseıdiń iri eksporttyq porttarynyń birin salýǵa qatysyp jatqan túrli merdiger uıymdardyń qyzmetkerleri.
Aldyn ala derekter boıynsha, tártipsizdikke birneshe júz adam qatysqan. Oqıǵadan keıin ártúrli elderdiń 30-dan astam azamaty ustaldy. Tergeý áreketteri júrgizilgennen keıin ustalǵandardyń basym bóligi bosatyldy.
Sonymen qatar birqatar azamattarǵa, onyń ishinde Qazaqstan azamattaryna qatysty 10 táýlikke ákimshilik qamaýǵa alý týraly sot sheshimi qabyldandy. Taǵy úsh qazaqstandyqqa qatysty tergeý jalǵasyp jatyr.
– Qazaqstan azamattary arasynda zardap shekkender nemese medıtsınalyq kómekke muqtaj adamdar joq. Barlyǵyna qajetti konsýldyq-quqyqtyq kómek kórsetilýde, – dep málimdedi Bas konsýldyq.
Budan bólek, vahtalyq kenttiń ózinde jumysshylar, brıgadırler, Reseıdiń quqyq qorǵaý organdary, jumys berýshi kompanııa jáne kúzet agenttigi ókilderiniń qatysýymen kezdesý ótti.
Kezdesý barysynda jaǵdaı jan-jaqty talqylanyp, aldaǵy ýaqytta osyndaı oqıǵalardyń aldyn alý sharalary qarastyryldy.
Qazirgi ýaqytta kenttegi jaǵdaı turaqty. Oqıǵaǵa qatysqan taraptarǵa qatysty tergeý is-sharalary jalǵasyp jatyr. Tergeý qorytyndysy boıynsha janjalǵa qatysýshylardyń áreketterine quqyqtyq baǵa beriledi.
Aıta keteıik, 27 naýryz kúni áleýmettik jelilerde Reseıdegi qurylys nysandarynyń birinde bolǵan jappaı tóbelestiń vıdeosy qyzý talqyǵa tústi. Bulardyń arasynda Qazaqstan azamattary bolýy múmkin ekeni aıtyldy. Óz kezeginde QR Syrtqy ister mınıstrligi shuǵyl tekserý jumystaryn bastaǵanyn málimdedi.
Kelesi kúni oqıǵaǵa qatysqan qazaqstandyqtar arasynda aýyr jaraqat alǵandar joq ekeni belgili boldy.
