Ýspen aýdanynda paıdalanylmaıtyn jerlerge salyqty 10 esege arttyrmaq - Pavlodar oblysy
ASTANA. QazAqparat - Paıdalanylmaıtyn aýyl sharýashylyǵyna jaramdy jerlerge salyqty 10 esege arttyrýdyń arqasynda Ýspen aýdanynyń bıýdjeti 4,2 mln teńgege tolyqpaq.
Bul týraly búgin óńirlik kommýnıkatsııalar qyzmetinde ótken brıfıng kezinde Ýspen aýdanynyń ákimi Sergeı Salamatskıı málim etti, dep habarlaıdy pavlodarnews.kz.
«Jer salyǵyn 10 ese kóbeıtý týraly» aýdandyq máslıhattyń sheshimine sáıkes Ýspen aýdanynyń memlekettik kirister departamentine aımaqtaǵy paıdalanylmaı júrgen jáne paıdalaný sharttaryn buzyp otyrǵan sharýashylyqtar men kásipkerlerdiń tizimi jiberilgen bolatyn. Osylaısha, 11,3 myń gektar jerde 30 jer ýchaskesi bar sharýalar 4,2 mln teńge salyq tóleýi tıis», - dedi Sergeı Salamatskıı. Spıkerdiń aıtýynsha, bıyl kásipkerler 3940 gektar jerdi memleket menshigine qaıtardy. Osy aıdyń sońyna deıin kásipkerlerge jer telimderin jalǵa berý boıynsha konkýrs ótkiziledi. Jalpy aýdanda jalǵa berilýge daıyn 7057,9 gektardy quraıtyn 35 jer ýchaskeleri bar.
