US Open: Zańǵar Nurlanuly qazaqstandyqtar arasynan alǵash ret jartylaı fınalǵa shyqty

ASTANA. KAZINFORM — Qazaqstandyq tennısshi, 17 jastaǵy Zańǵar Nurlanuly jasóspirimder arasynda AQSh ashyq chempıonatynyń jartylaı fınalyna joldama aldy.

ITF Juniors reıtıngisinde 54-orynda turǵan Zańǵar Nurlanuly shırek fınalda jarystyń 13-raketkasy bolyp tirkelgen reseılik, 18 jastaǵy Tımofeı Derepaskomen sheberlik baıqasty.

T.Derepasko — jasóspirimder ǵana emes, eresekter arasynda da oınap úlgergen tennısshi, ol ATP reıtıngisinde 925-orynda tur.

Birinshi partııada esep 1:1 bolǵan mezette Zańǵar breık jasaı bildi. Sodan keıin taǵy bir breıkke qol jetkizdi — 6:2.

Ekinshi setti Z.Nurlanuly breıkpen bastaǵanymen, sony jalǵastyra almady — 1:1. Degenmen esep 3:3 bolǵanda, qaıyra breık jasap, óz geımin aldy — 5:3. Sodan keıin matchty jeńispen túıindedi — 6:4.

Saǵat jarymǵa jýyq ýaqytqa sozylǵan básekede Zańǵar batyl óner kórsetip, qarsylasynyń aldyn orap ketip otyrdy. 

Zańǵar Nurlanuly fınalǵa shyǵý úshin jasóspirimder arasynda álemniń 1-raketkasy, bolgarııalyq Ivan Ivanov nemese germanııalyq Maksım Shonhaýestiń qaı jeńgenimen talasady.
AQSh ashyq chempıonatynda qazaqstandyqtardan jalǵyz Zańǵar qaldy.

Z.Nurlanuly jasóspirimder arasynda qazaqstandyqtardan osyndaı tabysqa alǵash ret jetip otyr.

Eske sala keteıik, budan buryn Zańǵar Nurlanulynyń alǵash ret «Úlken dýlyǵa» týrnıriniń shırek fınalyna ótkenin jazǵan edik.