«Usqynsyz úırek»: Almaty zoobaǵynda erekshe qus dúnıege kelgen
Megapolıstiń haıýanattar baǵynan málim etkendeı, zoobaqta kesh týǵan úki balapany bar. Onyń ata-anasy zoobaqqa Chehııa men Frantsııadan 2019 jyly ákelingen. Ótken jyly úkiler jubynda eki balapan ómirge keldi. Bıyl urǵashy úki úsh jumyrtqa basty. Uıada – eki, ınkýbatorda bir balapan jumyrtqa jaryp shyqty.
Alaıda, ınkýbatordan shyqqan qustyń surqy usqynsyz bolǵany atap ótiledi.
«Inkýbatsııa merzimi 30 kún boldy. 27 maýsymda jumyrtqadan balapan shyǵyp, bizdiń ornıtolog mamandardy qýanyshqa bólegen edi. Jumyrtqadan jańa shyqqan úki balapany ózge qustar sııaqty tartymdy ári súıkimdi týylmady. Kishkentaı úkimizdiń tumsyǵy úlken, aıaqtary uzyn, qaýyrsyndary uıpa-tuıpa, týra «Usqynsyz úırek» ertegisindegi suryqsyz qus sııaqty bolatyn. Biraq, sonda da biz oǵan erekshe qarap, jaqsy kórip kettik. Jyrtqysh qus bolǵandyqtan etti jaqsy jeıdi», - dep habarlady zoobaqtyń baspasóz qyzmeti.
Qazir balapan úki biraz ósip, kórikti qusqa aınalyp kele jatqany aıtylady.
