Úsik, jańbyr, naızaǵaı: 17 mamyrda aýa raıy qandaı bolady

ASTANA. KAZINFORM — Qazgıdromet mamandary 17 mamyr, jumaǵa arnalǵan aýa raıy boljamyn usyndy. 

Ońtústik tsıklony jáne soǵan baılanysty atmosferalyq fronttar Qazaqstan terrıtorııasynyń basym bóligine áserin saqtaıdy.

Saldarynan naızaǵaı oınap, jańbyr jaýady.

Ásirese ońtústik-shyǵysta, ońtústik-batysta qatty jańbyr, burshaq jáne daýyl boljanady.

Respýblıka boıynsha jel kúsheıedi, túngi jáne tańerteńgi saǵattarda eldiń soltústiginde, shyǵysy men ortalyǵynda tuman túsedi.

Túnde Aqmola, Soltústik Qazaqstan Pavlodar oblystarynyń soltústik-shyǵysynda, Pavlodar, Abaı oblystarynyń soltústiginde, Shyǵys Qazaqstan oblysynyń shyǵysynda topyraq betinde 1 gradýs úsik júredi.

Qaraǵandy oblysynyń ońtústiginde, Ulytaý oblysynyń ortalyǵynda, Abaı, Qostanaı oblystarynyń ońtústiginde, Atyraý oblysynyń ońtústik-shyǵysynda, Shyǵys Qazaqstan oblysynyń ońtústik-shyǵysynda, Qyzylorda oblysynyń soltústiginde, shyǵysynda, ortalyǵynda, Batys Qazaqstan oblysynyń ońtústik-batysynda, Jetisý oblysynyń shyǵysynda joǵary órt qaýpi bar. 

Túrkistan oblysynyń shóldi aýdandarynda, Abaı oblysynyń Úrjar aýdanynda tótenshe órt qaýpi saqtalady.