Úsik shalǵan qostanaılyq áýejaı mańynan tabyldy
QOSTANAI. QazAqparat - Qostanaı qalasynda súıiktisimen ursysyp qalǵan boıjetken áýejaıdan 3 shaqyrym qashyqtaǵy aýmaqtan tabyldy, dep habarlaıdy «QazAqparat» HAA oblystyq qylmystyq-atqarý júıesi departamentiniń baspasóz qyzmetine silteme jasap.
19 qańtar kúni saǵat 21:00-der shamasynda 161/11 QK túzetý mekemesiniń aǵa ınspektor-psıhology Dınara Madıarova er adamnyń kómekke shaqyrǵan daýsyn estıdi.
«Kezekshilikte otyrǵan ol dereý óziniń áriptesteri Іlııas Býkaev pen Ashat Balambaevtarǵa habar bergen. Túzetý kolonııasynyń qyzmetkerleri daýys shyqqan óndiris aımaǵy jaqqa baǵyt alady. Bularǵa taǵy eki qyzmetker qosylyp, kómek suraǵan er adamdy tapqan. Ol «Qostanaı - Fedorov» tasjolynyń jıeginde turdy», - delingen vedomstvonyń baspasóz habarlamasynda.
Belgili bolǵandaı, bul jigit óziniń súıiktisimen birge taksımen Qostanaıdan kele jatqan. Kólik ishinde ekeýiniń arasynda urys-keris týyndaǵan.
«Janjaldan soń boıjetken kólikten shyǵyp, qala jaqqa jalǵyz bet aldy. Osy kúni aýa raıy - 28 gradýsqa deıin tómendedi. Jigit súıiktisin ózdigimen izdep, taba almaǵan soń kómek shaqyrǵan», - dep málimdedi baspasóz qyzmetindegiler.
Osylaısha, túzetý kolonııasynyń qyzmetkerleri boıjetkendi áýejaıdan 3 shaqyrym qashyqtaǵy aýmaqtan tapty. Úsik shalǵan ol 161/11 QK túzetý mekemesine jetkizildi. Alǵashqy medıtsınalyq járdem alǵan soń psıholog qyzmet kórsetti.
