Ýshýdan tarıhı altyn alǵan sportshy jetistiginiń syryn aıtty
ASTANA. KAZINFORM – Qazaqstandyq Ildar Amırdınov ýshý-sandadan jastar arasyndaǵy álem chempıonatynda tarıhı altyn jeńip, el qýanyshyn eseledi. Jas sportshy men onyń bapkeri Alııar Kamerdınov jeńistiń syrymen Jibek Joly telearnasynyń «Búgin Live» baǵdarlamasynda bólisti.
Qytaıdyń Tıantszın qalasynda ótken dúbirli dodada Ildar fınalǵa deıin senimdi jetip, sheshýshi jekpe-jekte mysyrlyq qarsylasyn jeńdi. Bapkerdiń aıtýynsha, bul nátıje josparly daıyndyqtyń jemisi.
– Ýshý-sanda – tolyq baılanystaǵy jekpe-jek túri, onda soqqy, tebý jáne laqtyrý ádisterine ruqsat etiledi. Sportta tártipke erekshe mán beremiz. Jetistiktiń syry da osy. Týrnır aldynda Qazaqstan quramasy Qytaıda oqý-jattyǵý jıynyn ótkizdi, jergilikti sportshylarmen birlesken daıyndyqtar ótti, – deıdi bapkeri.
Ildar sportqa nebári 5 jasynan bastap kelgen. Onyń aıtýynsha, tek fızıkalyq emes, psıhologııalyq jáne moraldyq daıyndyq ta úlken ról atqarady.
– Alańǵa 48 kelige deıingi salmaqta shyqtym. Qarsylastar kóp boldy. Fınaldaǵy mysyrlyq sportshymen aıqas ońaı bolǵan joq, sońǵy sátterge deıin tartys júrdi. Fınalǵa deıin de eki myqty sportshymen kezdestim. Psıhologııalyq, fızakalyq daıyndyq kómektesti, – deıdi Ildar.
Aıta keteıik, 23-31 naýryz aralyǵynda Tıantszınde ótken álem chempıonatyna 78 elden 1100-den astam sportshy qatysty. Bul – ýshýdan jastar arasyndaǵy 10-shy álem birinshiligi.
Qazaqstan quramasy tarıhı nátıjege qol jetkizip, jalpy 10 medal (3 altyn, 3 kúmis, 4 qola) jeńip aldy. Osylaısha, táýelsiz Qazaqstan tarıhynda ulttyq jastar quramasynyń birden úsh altyn enshilegen alǵashqy iri jetistigi tirkeldi.
Buǵan deıin 18 qazaqstandyq sportshy 2026 jylǵy jasóspirimder Olımpıadasyna shaqyrtý alǵan edi.
