Ushýdan bas tartqan jolaýshylar kóp boldy – Pıter Foster
ALMATY. QazAqparat – Almaty halyqaralyq áýejaıy ishki áýe reısterdiń alǵashqysyn qabyldady. Jolaýshylar Nur-Sultannan ońtústik astanaǵa ushyp keldi, dep habarlaıdy QazAqparat tilshisi.
Air Astana áýekompanııasynyń prezıdenti Pıter Fosterdiń aıtýynsha, jolaýshylar ushýdan bas tartyp jatyr. Oǵan sebep, koronavırýsqa tekserý protsedýrasy.
«Bul Qazaqstannyń men avıatsııanyń damýy úshin óte mańyzdy. Búgin tańerteń Almaty-Nur-Sultan jáne keri baǵyttaǵy alǵashqy reısti aıaqtadyq. Jalpy, biz osy marshrýt boıynsha kúnine úsh reıs jasaımyz. Biz reısterdi azamattyq avıatsııany qalpyna keltirý úshin jańa sanıtarlyq talaptarǵa sáıkes jasaımyz. Áýe kemesinde áleýmettik qashyqtyq ólshemderi engizildi», - dedi Air Astana kompanııasynyń prezıdenti Pıter Foster.
Sonymen qatar, ol avıakompanııa barlyq talaptardyń mańyzdylyǵyn túsinetinin atap ótti.
«Biz úshin jolaýshylar qaýipsizdigi – basty mindet. Osy qoıylǵan talap boıynsha alǵa jyljımyz. Biz sondaı-aq tótenshe jaǵdaı aıaqtalǵannan keıin ishki baǵyttar jelisin keńeıtýdi josparlap otyrmyz», - dedi ol.
Pıter Foster marshrýt boıynsha eń joǵary tarıf 36 myń teńge, eń tómengi 21 myń teńge ekenin atap ótti.
«Bul tek birinshi reıs, júkteme aıtarlyqtaı joǵary boldy dep aıtýǵa bolady, biraq jolaýshylar tarapynan bastartýlar kóp boldy. Óıtkeni testileý protsedýralary óte kúrdeli jáne qymbat», - dep tolyqtyrdy ol.
Almatydan elordaǵa alǵashqy reıspen 75 jolaýshy ushyp bardy.
Eske sala ketsek, 4 mamyrdan bastap Nur-Sultan men Almatydan Qyzylordaǵa, Petropavlǵa, Óskemenge jáne Semeıge áýe qatynastary qaıta jandanady.
