Ushý qaýipsizdigine qaýip tóndiretin qoqys polıgondary qaı óńirlerde bar
ASTANA. KAZINFORM – Qazaqstannyń Abaı, Atyraý, Qaraǵandy jáne Soltústik Qazaqstan oblystarynda áýejaı mańyndaǵy qoqys polıgondaryna qatysty jumystar júrgizilip jatyr. Bul týraly Qazaqstannyń avıatsııalyq ákimshiligi Kazinform agenttiginiń resmı saýalyna bergen jaýabynda málim etti.
Vedomstvo málimetinshe, áýejaılarǵa jaqyn ornalasqan turmystyq qaldyqtar polıgondary qustardyń kóptep shoǵyrlanýyna sebep bolýy múmkin. Bul áýe kemeleriniń qustarmen soqtyǵysý qaýpin arttyrady.
– Osyǵan baılanysty elimizde áýeaılaqtyń baqylaý núktesinen 13 shaqyrym radıýsta ornalasqan qatty turmystyq qaldyqtar polıgondaryn joıý jáne jańa nysandardy atalǵan aýmaqtan tys jerge ornalastyrý jumystary júrgizilip jatyr. Atap aıtqanda, Batys Qazaqstan oblysynda Oral qalasynyń áýejaıyna jaqyn ornalasqan qoqys polıgony joıyldy. Al Abaı, Atyraý, Qaraǵandy jáne Soltústik Qazaqstan oblystarynda polıgondardy salý jáne kóshirý sharalary júzege asyrylyp jatyr, - delingen jaýapta.
Budan bólek, Balqash qalasynda jańa qoqys polıgonynyń qurylysy aıaqtalǵan. Qazirgi ýaqytta ony paıdalanýǵa berý boıynsha jumystar júrgizilip jatyr.
– Degenmen qoldanystaǵy polıgondardy tolyq joıý, olardyń aýmaǵyn rekýltıvatsııalaý jáne jańa nysandardy iske qosýǵa qatysty jekelegen máseleler áli baqylaýda, - delingen vedomstvo jaýabynda.
Avıatsııalyq ákimshiliktiń habarlaýynsha, bul jumystar jergilikti ákimdikterdiń quzyretine jatady.
Elimizde ushaqtar kóbinese qandaı qustarmen soqtyǵysatynyn jazǵan edik.
Áýejaılardaǵy qustardy úrkitý úshin qandaı ádister qoldanylatyny belgili boldy.
