Úshtóbede muǵalim koronavırýs týraly jalǵan aqparat taratqan
ALMATY OBLYSY. QazAqparat – Kólik polıtsııasy 48 jastaǵy Úshtóbe qalasy turǵynynyń kórineý jalǵan aqparat taratqanyn anyqtady, dep habarlaıdy QazAqparat Kóliktegi polıtsııa departamentiniń baspasóz qyzmetine silteme jasap.
28 naýryz saǵat 21:15-te Taldyqorǵan qalalyq kólik prokýratýrasynyń kezekshi prokýrory áleýmettik jelige monıtorıng jasaý barysynda Úshtóbe stansysynda koronavırýs juqtyrǵan bolýy múmkin degen kúdikpen eki azamatty poıyzdan túsirip tastaý týraly jalǵan aqparat taratylǵanyn habarlady.
Taralǵan aýdıotaspada belgisiz áıel Úshtóbe stansysynda koronavırýs juqtyrýy múmkin degen kúdikpen eki azamattyń poıyzdan túsirilgenin aıtqan. Atalǵan habarlama Úshtóbe stansasynda Jelilik polıtsııa bólimi Sotqa deıingi tergeýdiń biryńǵaı tizilimine QR QK 274-baby 2-tarmaǵy 4-bóligi boıynsha (Kórineý jalǵan aqparat taratý) tirkeldi.
30 naýryzda jedel-izdestirý sharalary barysynda 48 jastaǵy Úshtóbe turǵyny ustaldy, ol qaladaǵy orta mektepterdiń birindegi muǵalim bolǵan. Áıel tergeý kezinde óziniń áreketin moıyndap, Whatsapp messendjerinde kórineý jalǵan aqparat taratqanyn rastady. Tergeý júrip jatyr.
