Úshtildilik ıdeıasy júzege asyrylýda
ASTANA. QazAqparat - 24 sáýirde Qazaqstan Respýblıkasy Prezıdentiniń janyndaǵy Memlekettik basqarý akademııasynda memlekettik qyzmetshiler arasynda til saıasatyn júzege asyrýdaǵy ozyq tájirıbelerdi jınaqtaýǵa jáne tanysýǵa arnalǵan «Memlekettik qyzmetshilerdiń memlekettik jáne shet tilderin meńgerýine yqpal etýshi ekstralıngvıstıkalyq faktorlar» taqyrybynda «dóńgelek ústel» ótti, dep habarlady osy oqý ornynyń baspasóz qyzmeti.
Ǵalym-lıngvıster, pedagogter jáne qoǵam qaıratkerleri dıaloginiń ózegi - Elbasynyń «Qazaqstan úshin úshtildilik qalypty qubylys bolýy kerek» degen ıdeıasymen astarlas bolýy daýsyz.
Bul is-sharany ótkizýdegi kezdesý orny da kezdeısoq emes. Qazaqstan Respýblıkasy Prezıdentiniń janyndaǵy Memlekettik basqarý akademııasy Qazaqstan Respýblıkasynyń barlyq óńirine kadr daıarlaıtyn oqý orny bolyp tabylady. Akademııada «Memlekettik jáne jergilikti basqarý», «Sot tóreligi», «Halyqaralyq qatynastar», «Saıasattaný», «Menedjment» jáne «Ekonomıka» mamandyqtary boıynsha memlekettik qyzmetshilerdi daıarlaıdy, qaıta daıarlaıdy jáne biliktilikterin arttyrady. Oqý pánderi aǵylshyn, memlekettik jáne orys tilderinde júzege asyrylady. Akademııanyń Memlekettik jáne shet tilderi kafedrasy «Resmı-iskerlik qazaq tili», «Aǵylshyn tili boıynsha tildik portfolıo» jańa kýrstaryn ázirledi. Birneshe shet tilin qatar úırený jańa ádistemesine aprobatsııa jasaldy, onnan astam oqý quraly men sózdikter jaryqqa shyqty.
Dóńgelek ústelge qatysqan astanalyq joǵarǵy oqý oryndarynyń jetekshi professorlary jáne tilshi-praktıkter til qurylymynyń ár túrli qyrlaryn jan-jaqty talqylady. Sonymen qatar, AQSh Elshiliginiń ókilderi, Eýropa Odaq jobasynyń aǵa saraptamashysy - «Qazaqstan úkimeti memlekettik qyzmetiniń reformasy jáne modernızatsııasy», ıÝnýs Emre atyndaǵy Túrik mádenı ortalyǵynyń jáne Memlekettik tildi damytý qorynyń jetekshileri ulttyq tájirıbe boıynsha habarlamamen sóz sóılep, dıskýssııaǵa qatysty. Dóńgelek ústeldiń aýdıtorııasy Nazarbaev ýnıversıtetiniń professory, álemdik sotsıolıngvıstıkanyń tanymal mamany Tımatı Reıgannyń Qazaqstanda jumys istegen kezinde jınaǵan tájirıbesi men keńesterine, jańashyl-pedagogtardyń pikirlerine erekshe kóńil aýdardy.
Іs-shara sońynda praktıkalyq usynymdar qabyldandy.
