Úshinshi tulǵalardan alynǵan «Qaırat» — «Real Madrıd» bıletteri jaramsyz bolady

ALMATY. KAZINFORM — «Qaırat» — «Real Madrıd» bıletteriniń resmı satylymyn júrgizgen Ticketon jankúıerlerdiń shaǵymyna baılanysty resmı málimdeme jasady.

Ticketon kommýnıkatsııalar dırektory Azamat Atageldiniń aıtýynsha, olar bıletterdiń ádil ári ashyq satylýyn barynsha qamtamasyz etýge tyrysty.

— Satylymnyń sharyqtaý sátinde platformada bir mezette 1 mıllıonnan astam qoldanýshy boldy. Al stadıonnyń syıymdylyǵy — nebári 20 myń oryn. Bárine orynnyń jetpeıtini anyq. Ádiletti ótkizý úshin bar kúshimizdi saldyq. Bılet satý barysynda ár JSN-ǵa bir ǵana bılet, bir qolǵa ekiden artyq emes degen shekteý qoıyldy. Bul shekteý naǵyz shynaıy jankúıerdi qorǵaý maqsatynda engizilgen edi. Alypsatarlyqqa jol berilmedi, — dedi ol.

Sondaı-aq ol jankúıerler tarapynan «kezek qatyp qaldy» nemese «júıe qaıta júkteldi» degen shaǵymdarǵa jaýap berdi.

— Satylym saǵat 17:00–de qatań tártippen bastaldy. Júıe qalypty jumys istedi. Al erterek kirgen qoldanýshylardyń sessııasy avtomatty túrde jańaryp otyrdy. Bul retsiz ajıotajdyń aldyn alý úshin engizilgen tehnıkalyq shara. Bıletterdiń satylymy jóninde aqparat bizdiń jáne «Qaırat» FK resmı arnalarynda aldyn ala jarııalanǵan, — dep túsindirdi ol.

Sondaı-aq Ticketon ókili jankúıerlerdi abaı bolýǵa, kúmándi saıttarǵa, «qoldan-qolǵa» satylady degen usynystarǵa senbeýge shaqyrdy. Aıtýynsha, aqshadan aıyrylyp, stadıonǵa kire almaı qalý qaýpi bar.

Eske salaıyq, buǵan deıin «Qaırat» pen «Real Madrıd» kezdesýine bılet satylymy bastalǵan kezde kezekte 120 myńnan astam adam turǵanyn jazǵanbyz.