Úshinshi elderde shyǵarylǵan navıgatsııalyq plombalardy qoldaný merzimi uzartyldy
ASTANA. KAZINFORM — Eýrazııalyq ekonomıkalyq komıssııa keńesi Qazaqstannyń navıgatsııalyq plombalardy paıdalaný merzimin uzartý jónindegi usynysyn qoldady, dep habarlaıdy Ulttyq ekonomıka mınıstrliginiń baspasóz qyzmeti.
Onlaın formatta ótken EEK keńesiniń kezekti otyrysynda Premer-mınıstrdiń orynbasary — ulttyq ekonomıka mınıstri Serik Jumanǵarın bastaǵan qazaqstandyq delegatsııa taýarlardy tasymaldaýdy baqylaý úshin qoldanylatyn, úshinshi elderde óndirilgen navıgatsııalyq plombalardy paıdalaný merzimin uzartý jóninde bastama kótergen bolatyn.
Bul bastama EEK Keńesiniń 2023 jylǵy 4 shildedegi sheshimine sáıkes 2026 jyldyń 7 qyrkúıeginen bastap Eýrazııalyq ekonomıkalyq odaqqa (EAEO) múshe memleketterdiń operatorlary tek Odaq aýmaǵynda óndirilgen navıgatsııalyq plombalardy paıdalanýǵa mindetti bolýyna baılanysty usynyldy.
Qazaqstannyń júk tasymalyn baqylaý jónindegi Ulttyq operatory — Qazaqstan Respýblıkasy Jasandy ıntellekt jáne tsıfrlyq damý mınıstrliginiń Ǵarysh tehnıkasy men tehnologııalary ınstıtýty.
— Qazir operator ózine tıesili qurylǵylarmen qatar eki jyl merzimge jalǵa alynǵan, úshinshi elderde óndirilgen shamamen 10 myń navıgatsııalyq plombany paıdalanyp keledi. Olardy merziminen buryn aýystyrý qosymsha qarjylyq shyǵyndardy talap etedi. Sonymen qatar, EAEO elderiniń qazirgi óndiristik qýaty Qazaqstannyń navıgatsııalyq plombalarǵa degen qajettiligin ázirge tolyq kólemde óteýge múmkindik bermeıdi. Sonymen birge elimizde navıgatsııalyq plombalardy otandyq óndiriste shyǵarýdy jolǵa qoıatyn kásiporyndar aıqyndaldy. Alaıda óndiristi iske qosý úshin qosymsha ýaqyt qajet. Talqylaý qorytyndysy boıynsha EEK Keńesi Qazaqstannyń usynysyn qoldap, Eýrazııalyq ekonomıkalyq komıssııanyń tıisti sheshiminiń kúshine ený merzimin 2028 jyldyń 1 qańtaryna deıin uzartý týraly sheshim qabyldady, — delingen vedomsvo habarlamasynda.
Budan bólek, keńes veterınarııalyq baqylaýǵa jatatyn obektilerge birlesken tekserýler júrgizý jáne ónim úlgilerin irikteý tártibi týraly erejege engiziletin ózgeristerdi maquldady. Engizilgen túzetýlerge sáıkes, ýákiletti organdar bes jyldan astam ýaqyt boıy EAEO-ǵa múshe memleketterdiń aýmaǵyna baqylaýdaǵy ónimdi jetkizbegen úshinshi elder kásiporyndaryn tizilimnen shyǵarý týraly bastama kótere alady.
Sondaı-aq Keńes EAEO-nyń «Parfıýmerııalyq-kosmetıkalyq ónimniń qaýipsizdigi týraly» tehnıkalyq reglamentine engiziletin ózgeristerdi maquldady. Ózgerister ónimge qosarlanǵan toksıkologııalyq synaq júrgizý jónindegi mindetti talaptyń qoldanysqa engizilý merzimin bir jylǵa keıinge qaldyrýdy kózdeıdi. Bul sheshim atalǵan zertteýlerdi júrgizýge múmkindigi bar akkredıttelgen zerthanalar sanynyń shekteýli bolýyna baılanysty qabyldandy.
Osyǵan deıin ınflıatsııanyń baıaýlaýy halyqtyń naqty tabysynyń jyl ishinde alǵash ret oń dınamıkaǵa shyǵýyna yqpal etkenin jazǵanbyz.
