Úshinshi boksshymyz lıtsenzııalyq týrnırde jeńilis tapty
ASTANA. KAZINFORM – Italııanyń Býsto-Arsıtsıo qalasynda ótip jatqan lıtsenzııalyq týrnırde búgin úshinshi boksshymyz jarys jolynan shyǵyp qaldy.
Naqtyraq aıtsaq, erler arasynda 63,5 kelidegi el namysyn qorǵap jatqan Muhammedsabyr Bazarbaıuly 1/16 fınalda Eýropa chempıony Radoslav Rosenovtan jeńilip qaldy.
Bul Parıj olımpıadasyna joldama sapaqa salynyp jatqan jarystaǵy qazaq boksshylarynyń úshinshi jeńilisi.
Osyǵan deıin sharshy alańǵa alǵash ret shyqqan 54 keli salmaqta Jaına Shekerbekova irikteý kezeńiniń alǵashqy aıqasynda 1/16 fınalda Nıgerııa ókili Shýkýra Karımge ese jiberip, jarysty aıaqtasa, 60 kelide judyryqtasqan boksshymyz Rımma Volosenko tórtinshi jekpe-jeginde, ıaǵnı shırek fınalda Slovakııa sportshysy Mıroslava Jedınakovaǵa tóreshiler sheshimimen ese jiberip, lıtsenzııadan qur qaldy.
Endi, mine, erler arasynda birinshi ret Muhammedsabyr Bazarbaıuly jeńilis tapty.
Aıta keteıik, Parıj Olımpıadasynyń joldamasy sarapqa salynyp jatqan týrnır 3 naýryzda bastalǵan bolatyn. Jarys 12 naýryz kúni máresine jetedi. Atalǵan týrnırde erler arasynda 28, áıelder arasynda 21 joldama sarapqa salynyp jatyr. Qazaqstan quramasynan erlerden 6, áıelderden 5 boksshy joldamaǵa talasyp jatyr.
