Ushqyshtar daıarlaıtyn joǵary oqý ornyna úmitkerlerdi irikteý bastalady
Oqý orny «memlekettik avıatsııadaǵy áýe kemelerin ushýǵa paıdalaný», «avıatsııalyq tehnıka jáne tehnologııalar», «ushqyshsyz basqarylatyn qurylǵylardy paıdalaný», «áskerı medıtsına», «áskerı istegi teńiz tehnıkasy jáne tehnologııalary» mamandyqtary boıynsha daıarlaıdy.
– Joǵary oqý orny tájirıbeli professorlyq-oqytýshylyq kadrlarmen jasaqtalǵan. Bul bilim ordasynda kýrsanttardy ushý jáne ınjenerlik-tehnıkalyq mamandyqtarǵa oqytý úshin qajetti materıaldyq-tehnıkalyq baza bar, – dep atap ótti Áýe qorǵanysy kúshteri áskerı ınstıtýtynyń bastyǵy polkovnık Talǵat Syzdyqov.
Oqý ornyna irikteý barysynda talapkerler áskerı-dárigerlik saraptama júrgizý qaǵıdalaryna sáıkes kásibı-psıhologııalyq irikteýden, medıtsınalyq kýálandyrýdan ótedi, dene daıarlyǵy jónindegi normatıvterdi tapsyrady.
Bıyl ınstıtýt qazaqstandyqtar úshin 215 oryn, Reseı, Armenııa jáne qytaı áskerı oqý oryndaryna túsetin talapkerler úshin 28 oryn bólip otyr. Budan basqa, UQShU-ǵa múshe memleketter úshin áskerı kadrlar daıarlaý týraly kelisimge sáıkes oqý orny Tájikstan Qarýly kúshteriniń ókilderine 6 oryn beredi.
Kýrsanttardy «áskerı istegi teńiz tehnıkasy jáne tehnologııalar» mamandyǵy boıynsha bilim alýdyń erekshelikteri bar. Alǵashqy eki kýrsta jalpy bilim beretin jáne jalpy áskerı pánderdi oqytý Áýe qorǵanysy kúshteriniń áskerı ınstıtýtynda júredi. Al úshinshi – besinshi kýrstardaǵy teńiz tehnıkasyna qatysty beıindi pánder Aqtaý q. Shahmardan Esenov atyndaǵy Kaspıı tehnologııa jáne ınjınırıng ýnıversıtetinde oqytylady.
Qazaqstanda áskerı mamandardy daıarlaý Almatydaǵy eki joǵary oqý ornynda – armııa generaly Saǵadat Nurmaǵambetov atyndaǵy Qurlyq áskerleriniń áskerı ınstıtýtynda jáne Radıoelektronıka jáne baılanys áskerı-ınjenerlik ınstıtýtynda, sondaı-aq Aqtóbedegi eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteriniń áskerı ınstıtýtynda júzege asyrylatynyn aıta ketken jón.
Bul oqý oryndarynda taktıkalyq býyn komandırleri daıyndalady. Bilim alyp shyqqan túlekterge «leıtenant» áskerı ataǵy beriledi.
