Ushqysh kýrsanttar ózderiniń birinshi ushýlaryn Talǵat Bıgeldınovtiń qurmetine arnady (FOTO)

ASTANA. QazAqparat - Búgin Áýe qorǵanysy kúshteri Áskerı ınstıtýtynyń kýrsanttary An-26 áskerı-kólik ushaǵynda ózderiniń alǵashqy ushýlaryn oryndady. Bul ushýlar aty ańyzǵa aınalǵan qazaq ushqyshy Talǵat Bıgeldınovtiń týylǵan kúnine oraı oryndaldy.

Bul týraly QR QM baspasóz qyzmeti habarlady.

«Instıtýtymyz qazaqtyń áıgili ushqyshy, Keńes Odaǵynyń eki márte batyry Talǵat Bıgeldınovtiń esimin maqtan tutady, al ushqysh kýrsanttar onyń izbasarlary bolyp tabylady. Uly Jeńiske, egemendi Qazaqstannyń Áýe qorǵanysy kúshterin damytýǵa Talǵat Bıgeldınovtiń qosqan úlesi shynynda da orasan zor», - dedi ÁQK Áskerı ınstıtýtynyń bastyǵy polkovnık Marat Botın.

Sonymen qatar, osy kúni ınstıtýt qabyrǵasynda eske alý keshi ótti. Ofıtserler, oqytýshylar jáne ardagerler kýrsanttarǵa batyr ushqyshtyń dańqty erlikteri týraly syr shertti.

Talǵat Bıgeldınov 1922 jyly 5 tamyzda Aqmola oblysynyń Maıbalyq kentinde dúnıege kelgen. Keńes Odaǵynyń eki márte batyry, avıatsııa general-maıory ataǵynda ol 2014 jyldyń 10 qarashasynda 92 jasynda baqılyq boldy. Qazirgi ýaqytta Áýe qorǵanysy kúshteriniń Áskerı ınstıýty jáne Respýblıkalyq áskerı mektep-ınternaty onyń esimimen atalady.